公司三文治——中層管理最抑鬱

某日A返工途中碰到從事記者嘅舊同學B，交換名片後B露出羨慕眼神。

B：「你就好啦！大學畢業短短五年就做經理，有成條Team跟你，做大佬話晒事。」

A（垂頭喪氣）：「絕對唔係你諗咁樣！如果有得揀，我寧願唔升。」

咪以為做經理帶住條Team係威係勢；查實中層管理人係最唔討好嘅角色——既要下屬心悅誠服，又要令上司認同領導才能，如果大公司仲要同其他國家千萬部門交涉，咪話唔心力交瘁。萬一條Team有咩差錯，中層管理人絕對係責無旁貸。據美國哥倫比亞大學梅爾曼公共衛生學院的一項調查結果*顯示，中層管理人員出現焦慮及抑鬱徵狀的比例最高 (18%)，而較低層的員工只佔12%，老闆則佔11%。

中層管理人壓力來源

職場中層夾心人，壓力爆煲嘅最大來源係喺邊度？

• 一切決策由高層話事，中層表面係主管實則零話事權。
• 上頭冇交帶清楚，下屬又需要你俾明確指引，萬一出錯，都只係中層嘅錯。
• 下屬搞鑊粥，中層要瞓身執手尾唔在講，仲奉旨做揹鑊達人。
• 有功勞永遠係歸功高層同老闆，慶功冇佢份！

抗壓之道：擴闊人際網絡，尋找工作滿足感

與其埋怨自己係公司三文治，中層管理人不妨嘗試：

• 修讀管理課程：一直Output遲早都變Dry，趁周末上呢類課程除咗汲取實用知識外，仲可認識不同行業嘅中層管理人，大家彼此交流心得，互相扶持，總好過成日自困喺死胡同內鑽牛角尖。
• 確立定位：清楚自己嘅角色，便可逐步了解你需要俾下屬幾多指引、你負責嘅範疇領域、其他部門對你條Team會提供幾多支援讓你完成任務。
• 找到滿足感的源頭：當你帶領下屬並令他們順利完成任務，或達成公司的目標，雖然你未必受人嘉許，但只要清楚那是你管理團隊得力的成果，便會找到辛勞付出的價值。

*資料來源：華盛頓郵報 The Washington Post, “The perilous plight of middle managers: Exploitation, domination and depression”, August 20, 2015

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。