各國媽媽有幾多有薪產假？香港得中國一半
媽媽，係世上最偉大嘅職業。初生頭一、兩個月，BB每兩、三個鐘喊醒一次，要換片、餵奶、掃風；BB邊食邊瞓，食一樽要半個鐘；掃風唔順利，又要掃半粒鐘；放返佢落BB床佢會嚎哭，一定要你抱住先肯瞓；到佢瞓著咗，你啱啱攞完個奶樽去消毒，都仲未有時間掂吓張床，佢又喊醒，重覆永不完結嘅餵奶輪迴……
到底呢份咁辛苦嘅工作，香港政府俾緊幾多人工俾我哋偉大嘅媽媽去做呢？其他國家俾working mom嘅福利又有幾多呢？
（括號內數字只計算母親產假福利，未計育嬰假、父親福利、baby bonus、扣稅等其他福利）
香港──逼放前4後6
有薪假期：10周 工資：80%（如月薪$20k，可得$40k）
香港媽媽產假規定要放前4後6（預產期前4星期開始放），好多媽媽會覺得產前放太耐、冇嘢做，產後得6星期休息又唔夠（講真BB得個半月大邊放得低㗎）。雖然喺公司同意之下，係可以改放前2後8，時間會見駛啲；但如果公司刻薄，逼住要早放都冇辦法。
最慘嘅係，香港媽媽竟然冇任何育嬰假、育兒津貼。咁辛苦，唔怪得越嚟越多人話唔生啦！
中國──生得多有著數
有薪假期：128天 工資：100%（如月薪$20k，可得$85k）
中國開放二孩政策後，亦延長咗產假，鼓勵媽媽多多生育，無論生第一胎定第二胎，都可以享有：98天基本產假 + 30天計生獎勵（即二孩以內）假 = 128天。此外，如果生多胞胎，每多一個可加15天，即係雙胞胎有143天，三胞胎有158天……香港樣樣都要跟，點解呢啲又唔跟吓？
台灣──老豆都有得放
有薪假期：8周 工資：100%（如月薪$20k，可得$40k）
放完產假之後，父母可以輪流申請各半年有薪育嬰假（半年工資60%）及無薪育嬰假（合共2年），即係媽媽返工，爸爸就喺屋企湊B餵奶換片買餸煮飯洗衫拖地洗廁所，等啲死佬成日以為full-time mom好歎吖喇！
（台劇《下一站，幸福》截圖／台視）
日本──專心湊B
有薪假期：14周 工資：60%（如月薪$20k，可得$42k）
父或母可以申請一年無薪育嬰假，並有育兒津貼（半年工資50%）。不過現實中，日本文化覺得母親照顧仔女係天職，唔可以搵奶奶、外母幫手，加上日本職場對孕婦同在職媽媽普遍存在冷眼、不友善嘅態度，所以好多媽媽都係會劈炮唔撈，專心喺屋企相夫教子。
（日劇《半澤直樹》截圖／TBS）
韓國──有得放都唔敢放
有薪假期：90天 工資：100%（如月薪$20k，可得$60k）
父母均可以申請一年無薪育嬰假，並有育兒津貼（1年工資40%）。但係韓國職場對在職媽媽都相當苛刻，公司唔想俾有薪假期，媽媽可能一大肚就會俾人炒咗，就算請到假都唔敢放足。如果生仔會冇咗份工，事業型女性唯有揀唔生囉！
新加坡
有薪假期：16周 工資：100%（如月薪$20k，可得$80k）
菲律賓
有薪假期：60天 工資：100%（如月薪$20k，可得$40k）
印度
有薪假期：最少12周 工資：100%（如月薪$20k，可得$60k）
澳洲
有薪假期：18周 工資：聯邦最低工資──每周656.90澳元（約可得HK$68k）
德國
有薪假期：14周 工資：100%（如月薪$20k，可得$70k），另有1年育嬰假（工資67%）
英國
有薪假期：38周 工資：首6周90%，後90%或每周139.58英磅（如月薪$20k，可得$80k）
意大利
有薪假期：22周 工資：80%（如月薪$20k，可得$88k），另父母各有半年育嬰假（工資30%）
俄羅斯
有薪假期：20周 工資：100%（如月薪$20k，可得$100k），另有78周育嬰假（工資40%）
加拿大
有薪假期：50周（產假+育嬰假） 工資：55%（如月薪$20k，可得$136k）
瑞典
有薪假期：68周 工資：首390天80%，後每天180克朗（如月薪$20k，可得$224k），另有65周育嬰假（工資80%）
美國
有薪假期：沒有 工資：沒有（父母各有12個月無薪假）
(Alicia Keys “Superwoman” MV截圖／Vevo)
資料來源：wikipedia、政府及新聞網站
延伸閱讀：
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
