地盤佬日誌:地盤術語

地盤佬日誌:地盤術語
Jobsdb content teamupdated on 09 October, 2018
Share

每一個行業都有佢好多自己嘅專有名詞同埋俗稱,地盤都唔例外,呢啲術語一講出嚟,通常都係同呢個行業相關嘅人先會明點解。

 

上網搵工術語

喺一啲建築界嘅求職平台,你可能會見到有人搵工時會寫:「本人搵工,白紙,齊三寶,唔係企鵝消防員飛機師,洗手出糧 800」

你係咪覺得隻隻字都識,但加埋一齊就唔知佢講咩?等我用多數人都明嘅詞語嚟解釋一次:「我想搵工(地盤),冇咩地盤經驗,有齊入地盤必須的三張基本證件(平安卡、工人註冊證、身份證),唔會返到嚟行行企企唔做嘢,唔會返一日工就唔見兩日,唔會應承咗返工最後放飛機,要求日薪$800放工出糧。」

 

來自英文的名詞

地盤有好多名詞,明明係中文但係外行人通常聽完都唔會明,例如寶路華、開士機等等。呢啲名詞多數都係當年由外國傳入的工具,因為當時呢啲工具都未有正式嘅中文名,所以啲人聽到啲鬼佬點叫,佢哋就攞近似嘅中文字音嚟做佢個名。

寶路華(blower):即係一部抽風機,可以抽風或當風扇用。

貓仔(Bobcat):即係小型裝載搬土機,因為體積輕巧,機身又印有貓嘅圖案,所以叫做貓仔。

開士機(material hoist):即係地盤用嘅物料升降機。因為佢冇雙重保險裝置,所以唔可以畀人坐上去。

大力佬/叻架佬(rigger):即係吊索工人,佢哋唔一定大力,而係用起重工具吊運大型貨件。

 

象形詞

而有部份地盤常用嘅名詞就係按照嗰樣嘢嘅形態去叫佢個名,有啲都幾有趣,例如挖掘機或挖泥機俗稱叫「雞頭」,因為佢做嘢嗰陣時就好似一隻雞喺度啄嘢食咁。又例如塔式起重機又叫「天秤」,一端用嚟吊運物件,中間為控制室,另一端就以巨型混凝土塊確保平衡,個結構有啲似秤,所以香港啲師傅多數都叫佢做天秤。

 

有好多時呢啲特別嘅名詞,係你入咗行慢慢做下做下就會識,我都只能夠簡單介紹一部分,有機會就你自己慢慢去領略啦!

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章

 

延伸閱讀:

地盤佬日誌-工程師轉工潮

地盤佬日誌-點樣吸引年青人入建築業?

地盤佬日誌-引入外勞好唔好?

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Industry stories

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.