地盤佬日誌-人體工學
唔講唔覺生活中每樣人造物品都係包含好多科學根據喺裏面，當中有好多次包括人體工學，又等我班門弄斧係咁以講吓。
人體工學
一件好嘅產品首先要個物品設計者有考慮人體工學，除非嗰啲產品只係一件裝飾品，如果唔係就要考慮使用人就唔就手，人用唔到就只係一件廢物。
我細個嗰陣時聽過一個故事係當年工業革命初期，需要大量煤但係係同緊工人人數同一個煤礦產煤量都可以有好大差別，之後管理層就去搵原因，佢哋發覺原來每個工人手上嘅工具鏟尺寸都係唔同，有啲就好鬼細有啲就好鬼大。之後佢哋就搵咗全煤礦效率最高嗰個工人嗰把鏟嘅尺寸去大量生產分發比所有工人，最初效果係好好工人每鏟鏟倒嘅煤都係好多，令到頭幾日嘅煤炭產量直線上升。但係差唔多一個禮拜後煤炭慘啊就反而下跌到比之前原本更差。管理層又去搵原因，佢哋發覺多數工人都疲累不堪，證明佢哋之前個方案係因為用一個最優秀嘅工人去咗基準點冇考慮到人會攰嘅因素。之後佢哋再做咗大中細三個型號尺寸之後再比工人反覆嘗試使用，之後搵出最高產量嗰個，現代標準尺寸手鏟就係呢個原形。
都有靚仔問過我點解一條大柱要放幾百支鋼筋（Y50 15kg/m)，唔可以設計啲大啲鋼筋例如Y100 (61kg/m) 咁樣咪可以放少好多支囉，我答佢你估吓咁樣啲師傅抬唔抬得起？
又聽過有大隻佬話地盤工作唔辛苦只係不停重複中等級強度運動，因為本身地盤工作就係按一般人可以連續工作全日的強度去設計。
我哋同設計師最多嗌交嘅地方就係設計話佢畫到你哋施工就要做到出嚟，但係好多時佢圖上面就只係一條線，但係實物係立體嘅，師傳落唔到手去安裝，咁樣就一定要設計師去改。
除非有一日全部機械人取代工人，如果唔係工作、工具、材料都要按照人體工學去設計先會得心應手。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
