地盤佬日誌-傳統做法VS科技
近年科技發展迅速，好多行業幾年仲有一次科技革命所有嘢都革新晒。相對俾我哋建築行業到而家都仲有好多嘢係用緊幾十年前嘅傳統做法。又等我簡單講吓我對傳統做法同科技嘅見解啦。
傳統做法
建築係一個千年歷史嘅行業，有啲習俗係源遠流長，尤其是某啲建築物料如果一路沿用可以係一個師傅幾十年前學返嚟嘅手法一路都唔變，亦都會因為師傅嘅經驗越來越多熟能生巧越做越手工越好。不過都有啲師傅比較頑固，就算有更加好更加快靚正慨做法或工具的拒絕去用。唔好話師傅有時連管理層都係用返幾十年前嗰套做法，唔好話BIM仲有啲連CAD都唔識睇，一定要要A0大圖先識睇。
科技革新
如果想科技革新好主要睇二樣嘢。
第一當然係成本問題啦，殺頭生意有人做，虧本生意無人做，而家世界資訊咁發達只有一樣嘢啲老細覺得有利可圖佢有機會會引入新科技，例如我上上單嘢泥水判頭買左部批蕩機，施工期間真係慳咗好多人手，不過可能嗰部機唔識用陰力（批蕩係師傅有啲技術用陰力先至容易癡得實），所以最後空鼓你平時用人手多好多，唔少要拆返出嚟，最後個判頭都好似係賺多咗少少，傳說中佢下一單就在買咗部新型號啲嘅批蕩機。
第二係政府嘅配合，就算一隻天下無敵快靚正又硬又耐用嘅新材料，只要政府話唔批准你使用，你都係一樣冇得用。但係如果政府真心想推廣個一樣新材料，可能個樣材料既環保又內容但係唯一缺點就係貴，如果政府肯進行補貼用咗就有多少稅務減免或者係送可建樓面面積。只需要啲老闆打個算盤發覺有錢嘅味道就會去做。
建築業嘅科技革新我個人覺得係比其他行業慢。我覺得有幾個理由。第一上層人仕唔想孭飛，之前有一隻外國用咗好多年嘅新材料，上比則師佢唔批，理由係無香港嘅工程案例（鷄先定蛋先嘅問題）。不過佢哋擔心都有道理嘅，因為有建築物出現耐久度或者安全性嘅問題，牽涉人命傷亡都係多到無法想像。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
