地盤佬日誌：地盤佬的最佳拍檔──搵食架生

正所謂工欲善其事，必先利其器。差唔多任何一個依賴手藝嚟搵食嘅行業，都需要一套相應嘅架生（工具）畀師傅工作，例如廚師手上嘅鑊鏟同刀，運輸工人手上嘅手推車。同樣地，地盤佬手上亦有各式各樣嘅架生，而每個行頭更有不同嘅架生，無咗啲架生基本上連工都開唔到，而如果架生唔就手，就算大師傅嘅功力都會減半。

有趣的地盤架生

我覺得地盤最有趣嘅架生，莫過於「土炮平水尺」──因為地盤或裝修場地嘅地面不平，所以開始任何工作之前，首先要用平水尺在全房開出一條1米高嘅平水線，之後所有房內嘅高度都按呢個基準計算（例如假天花底在線上1.2米，燈掣在線上0.3米，木地板面在線下0.95米，如果平水線有錯就之後所有工序都會錯）。

喺高科技工具（如激光平水儀）未普及嘅年代，裝修佬開大面積平水線時係唔會用一般嘅平水尺，因為一般平水尺會有誤差。而當時佢哋就會用一條長長嘅透明軟管，裝八九成水之後當平水尺用，開出來嘅平水點係好準確的。其實呢個民間智慧係利用咗物理學上U型連通管嘅原理，因為大氣壓力一樣，兩邊管口嘅水永遠係喺同一高程、水平位置的，真係高手在民間。

另外有啲架生，一放咗上身就好有趣，一睇就知佢做邊個行頭：

「地盤武士」──釘板佬。點解？因為個個釘板佬腰間都有一支長長嘅鎚仔，睇落就好似一支武士刀咁。

「有尾的地盤佬」──搭棚佬。佢哋通常後面都有一紮紮竹用嘅膠帶，睇落就好似生咗條尾咁。

邊種地盤佬嘅架生最精簡？

紮鐵佬──大眾眼中嘅鐵漢子，個個都鋼條身型、手瓜起腱，但係佢哋嘅基本工具就只係一支細細隻、用嚟紮鐵線嘅鈎仔，同佢哋嘅身型好大對比，真係一隻鈎仔養活全家（其實即係用紮鐵佬嘅體力同辛苦嚟搵錢）。

架生是你的最佳拍檔

返工想順利，當然要同其他兄弟（同事）好好合作，但係喺地盤工作，其實好多時都係要單打獨鬥，呢個時候手上的生財工具就係你嘅最佳拍檔。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。