地盤佬日誌：地盤佬等於身體好？

時不時聽到有啲人講「做地盤佬等於可以免費做Gym，所以身體應該好好」。作為一個地盤佬，我自己就覺得唔係呢回事。

日日都吸埋唔少異物

喺地盤「打拆鎅切」係每日必須嘅工作，所以地盤入面每日都塵土飛揚，每個工人每日都要吸吸埋埋唔少英泥、灰、木糠等等，所以我深信好多地盤佬就算唔食煙都好，如果佢死咗之後要解剖個肺，一定會見到灰灰啡啡，仲可能畀啲英泥乸爛晒添。

加上好多建築材料使用時都會釋放有害物質，長年吸入我真係覺得會易啲生癌。

陽光燦爛好？

地盤有好多行頭都係長期要戶外工作，例如結構三寶（釘板扎鐵落石屎+機電埋喉）、地基工程等等，基本上都係每日同陽光玩遊戲。

有啲做Office嘅城市人因為平時無咩機會曬太陽，會覺得曬多啲會健康啲，但係事實上，曬得太多好容易曬傷同有皮膚癌，而眼睛長期接受過多嘅紫外線都會有眼疾。所以好多時啲地盤佬40度都仲係長衫長褲，真係寧願焗死都唔想曬出病。

加上香港嘅夏季都係伴隨雨水，汗水加雨水令地盤佬每日連底褲都都濕埋（分別只係由外到內還是由內到外），成日醃住令人好易有皮膚病、傷風感冒等小病。

高危工作

以燒焊佬為例，燒焊嘅工作往往伴隨着強烈嘅火光，我見唔少上咗年紀（50、60歲嗰啲）嘅燒焊佬都會有一定程度嘅青光眼、白內障。再加上焊接時會用一啲焊油，燃燒時會釋放有害物質，長期吸入對身體一啲都唔好。

阿媽講嘅嘢係啱嘅

人大咗就會發現，有時阿媽講嘅嘢係啱嘅，做阿媽嘅從來都會覺得做文職好，因為做文職真係冇咁辛勞同埋健康啲。

好多地盤佬到咗一定年紀後都會五勞七傷，所以有啲好好技術嘅師傅死命地要升到上去做管理，即使地盤裡面做管理嘅人工未必比師傅高都好，但係有時佢哋到一定年紀後，身體真係應付唔到咁高強度嘅工作。

其實做得地盤佬，通常都係想搵多個錢，令屋企人生活好啲，所以先唔介意用辛勞、健康、技術，嚟換取一份一家人足夠生存嘅薪金。希望各位兄弟做嘢時都儘量做足安全措施，頂唔順唔好夾硬嚟！

延伸閱讀：

地盤佬日誌：地盤佬的最佳拍檔──搵食架生

地盤佬日誌-點樣吸引年青人入建築業？

地盤佬日誌-引入外勞好唔好？ 

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。