香港地盤佬嘅人數都有六位數字,雖然多數人都係平凡人,不過當中一定不乏臥虎藏龍之輩。
▪ 下載ios版本Jobsdb手機app 或 下載Android版Jobsdb手機app
每個行頭都有啲傳說級嘅人物例如有每日紥鐵多人一倍嘅紥鐵佬、油防水100%唔漏水嘅防水佬、有工程學位嘅電王等等。不過都有啲人嘅勁係我都唔明,例如之前遇到有個地盤有三個鑽樁機手,佢哋大家都係用同一型號嘅鑽樁機,但係有其中一個機手鑚摏量比另外嗰兩個加埋都仲要多,情況就好似賽車嗰陣時每跑兩個圈就可以拋離一個圈,之後有次我同佢老細吹水,我就問佢可唔可以將另外果兩個機手都換咗佢,因為佢哋好慢如果三個都係快機手應該可以提早完工。
佢老細答:「佢兩個唔算慢都叫正常速度,係快機手快得離譜啫﹗你知唔知佢係全澳門鑽摏最快機手,個個老細都爭住請佢,佢開我十幾萬我都立即比佢,我自己再添加左。如果佢等我完工,我叫佢走佢先走我就比多幾萬奬金比佢,得佢一個係咁咋﹗唔好同其他人講,冇佢真係起唔到貨。」
「究竟係愛定係責任驅使你做一個地盤佬呢?」答案大家都只係窮㗎啦。但係依家啲地盤佬係咪真係咁窮呢,我只可以答你多數地盤佬入行時都幾窮(唔窮就搵啲無咁辛苦嘅工),不過啲老師傅就唔一定窮啦,我見有班老師傅係會放暑假嘅(5-9月就唔返工)你同佢哋傾吓計就會發覺佢哋通常都有幾層樓揸手,仲要係層層樓都full pay(因為以前地盤佬好難做按揭,而家地盤佬都唔容易做按揭)。
我之前係一間本地上市建築公司返工,嗰間公司嘅老細從前就係一個墨斗(開線工人),慢慢一步一步升左一個大老闆。
之前有段熱爆嘅網上影片就係一個全新地盤佬look嘅人係商場度彈鋼琴,仲要彈得非常之好聽。其實好多地盤佬曾經都有一兩門藝術係有唔錯根底,點解係曾經呢?因為多數人做咗地盤佬之後都冇再掂藝術了。你快樂過生活,我拼命去生存,幾多人位於山之巔俯瞰我的凌亂。手停口停,邊有咁多時間同精神去搞藝術啊?
港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。
檢視此作者的所有文章
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。