傳說每個地盤都有寶藏,有啲係好,有啲係唔好。
澳門近年有個傳說,話某高官知道海賊王嘅大寶藏one piece在澳門地底,所以就年年都全澳門四周圍挖路。我聽行家講澳門挖地底時都真係挖到好多寶物,大嘅試過挖到大航海時代嘅大炮。細嘅瓷器銅錢都成日挖到(不過我都未見過,因為太細,啲師傅一挖到就袋走咗。)
香港某個地盤因為挖到個古井又報咗上政府,最後個地盤就慢咗成年先起貨。
香港都成日挖到啲危險品,主要係二戰嘅遺產未爆嘅炸彈(戰爭嘅遺怕真係遺禍幾十年,希望世界和平。)
行地盤其實好似玩RPG game咁,一路行就一路會見到同伴,敵人同怪獸。一路地上面都有啲細寶箱(例如飯盒)不過千祈唔好咁有好奇心去打開佢,99%有野,小則臭死你,大則有屎或一家的曱甴老鼠。地盤多數都有怪獸巢,當年第一次睇打開地盤大沙井,幾百隻大小怪獸(曱甴老鼠蚊飛蟲等等⋯⋯)一齊飛出來,真係嚇Q死。
到判頭離場嗰時,有時啲架步會有唔少剩餘物資,小則金屬廢料可以拎去賣咖喱,我之前地盤啲大判雜工好鍾意去執;大則有啲工具或者機械。傳說之前澳門起威尼斯人,到起貨完工嗰陣時,好多香港判頭喺澳門其實只係做得呢個項目,所以走嗰陣時好多嘢都放低晒。傳說中連細雞頭山貓仔呢啲細機都有,聽聞嗰陣時清垃圾嘅老細就係咁樣發咗達,之後先有足夠資金越做越大。
港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。