地盤佬日誌：政府工程貴在程序同文件

同一單工程兩種價錢你想貴啲定平啲呢？當然冇人會咁樣問你啦，但係每一個判頭都會因應邊個係大業主/大判/工作地區令工程造價有所不同。有時甚至可以差幾十倍造價。

天價／賤價落標

同一間判頭有時每次叫佢落標價錢都可以好海鮮價。

落價貴通常係唔想做，有時係因為佢手上已經好多嘢做冇錢再頂多一單（因為每單都要墊支），有時係因為唔鍾意嗰個業主或者承建商（通常係佢哋手上瀨過大嘢蝕大錢）。

賤價落標，有時係因為手上冇嘢做又想養住一班工人或管理人員，咁就會落個唔點賺錢嘅價錢。另一個理由就係有時要打入某啲承建商或者業主嘅分判上名單（因為未有第一單就一定冇第二單）。

▪ 考香港牌好 還是英國牌好？資深工程師兼考牌教練為你拆解！

▪ 新興行業BIM入行門檻相對低 起薪點萬五至萬八

政府工程點解咁貴

好多人會問點解政府起啲嘢咁醜樣都可以起到咁貴？（好多人不禁會問係咪貪污）不過如果睇過啲政府合約嘅合約要求清單就會明白好多時行政同文件嘢仲貴過實際做事，唔貴就有鬼囉。

▪ 地盤佬日誌：「地盤佬食啲咩？」

貴的理由：

1. 有時政府指定嘅牌子的材料係超級貴，例如一粒拉爆螺絲如果指定hilti 同內地品牌，同一尺寸價錢可以相差幾十倍。
2. 文件製作及審批：政府工程嘅材料審批圖紙審批方案審批，一單好細嘅工程都可以有幾百份甚至幾千份相關嘅文件，仲要每分都要幾個顧問批核最後由政府確定。
3. 檢測費用，其實好多嘢檢測係貴過做，例如可能千零蚊搵個燒焊佬燒一日焊，但係搵實驗室過嚟驗焊要二三千。例如澳門做一道防火門嘅防火測試成本需要十幾萬。
4. 顧問費用，首先政府會請設計顧問包括建築結構機電，施工現場監察團隊，承建商另外在要請獨立工程師作審核。

▪ 基建頻出爐 測量師好「搶手」！經驗註冊測量師月薪高達八萬 成為測量師三部曲！

以我自己係行內咁多年我個人認為香港同澳門政府工程係冇乜貪污，今季好主要係因為政府人員同政府請嘅顧問唔想去負責任，就變咗將好多責任賣出去導致個做㗎咁貴。其實如果想政府工程做得平，只需要政府從善如流將某啲程序性的非工程工序簡化，可能政府工程就可以平好多啦。

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

檢視此作者的所有文章

 此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。