地盤佬日誌：新。地盤佬

個個都做地盤佬，你估個個都想做地盤佬咩。我估無人細個時寫「我的志願」會寫「大個要做一個扎鐵佬」，做得地盤，其實都係為咗生存而向現實低頭嘅一種選擇。

新一代的地盤佬

以前做得地盤佬一般都無咩文化，但係而家新一代嘅香港人，通常最少都高中畢業，文職人工又不斷貶值；相反，藍領工比較辛苦，無乜後生仔入行，因為缺人而令人工水漲船高，於是令部份比較高學歷的藍領出現，藍白領嘅學歷水平越來越接近，不時會有大專甚至大學學歷嘅建築工人出現。

地盤人工高？

近年報紙不時有報導，話釘板扎鐵落石屎$2,xxx一日人工超高，令到好多人覺得個個地盤佬都好高人工。的而且確，地盤工人嘅工資係比其他行業高啲，不過唔係大家想像中咁多。以地盤嘅主要工人嚟講，結構三寶（釘板扎鐵落石屎）嘅人工可以話係地盤之冠，當然辛苦程度都係全行之冠。至於其他裝修機電佬，多數人工都仲係$1,xxx一日。

另外，多數地盤佬都係無任何福利可言，因為地盤有好多師傅都係日薪工人或炒家（炒家就係判頭再分判到工人嘅方式，例如某判頭將一樓層分為10區畀10個炒家，要佢3日起貨，我唔理你一個定10個做都係咁多錢，簡單啲講就係自僱人士），MPF、醫保、年假、病假等等咩都無。

地盤佬點只體力咁簡單

眾所周知，地盤係重體力行業，好多新人一入行幾日就頂唔順話唔做。雖然多數人都係頂唔順長時間嘅高強度體力勞動，但有時就算有啲大隻仔入嚟，都一樣幾日就頂唔順，點解呢？因為地盤嘅環境比好多人想像中更加惡劣，要俾人鬧到毫無尊嚴，想搵個廁所難過登天，每個地方都污糟邋遢，又要做人肉吸塵機，危機四伏，真係有心理準備頂得順你至好嚟。

點解要入行？

我估都無乜人咁偉大會以建設社會做入行理由，其實大家之所以會前仆後繼咁走入呢個危險丶辛苦嘅行業，都係為咗喺香港呢個咩都要錢嘅超級現實社會，想有多少少嘅人工，令家人嘅生活過得好一啲。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。