地盤佬日誌—淺水浸蛟龍／不成大器
有啲人做開大公司大項目，慣咗都係做開工程金額幾十億、工人千千聲，仲要日日意氣風發，有成班擦鞋仔跟尾。自然，佢哋會睇唔起啲細公司細項目分判。但係，如果有一日經濟唔好，或者公司冇生意，搞到俾人炒咗出嚟走返去細公司或者做細項目。咪諗住做過大公司就掂，實際出嚟個效果未必一定咁好。
大公司大項目有咩難？
一樣嘢愈大，就愈需要系統化、規範化同制度化。即係每個人嘅分工亦都比較細，但係需要專。同埋因為人多，所以如果分配得均勻嘅話，每個同事嘅工作量都唔會太多，部份人可以專職淨係做死某啲嘢。反而最難嘅嘢係，適應制度化同埋人事關係嘅問題。制度化其實有好有唔好，好嗰方面係就算走咗某啲同事，其他人都比較容易跟返啲嘢。同埋，就算嗰個人比較蠢，只要佢肯學又跟足規矩都可以做得掂。
另外，點為之一間大公司呢？最基本就係人多囉！人多就是非多，管理亦都比較困難。所以，通常大公司嘅高層都未必係專業能力好高，而係管理能力人嘅能力比較重要。另外，大公司因為人多，可能管理層都好多。所以就算係同一樣嘢，都要經過好多個部門，再加上好多唔同嘅大佬去審批，搞到一啲本身好簡單嘅事變到好麻煩。
細公司細項目真係咁易做？
細公司多數嘅好處係因為細，所以權力分布通常比較簡單。多數情況下，都係老細或者一兩個大佬話事。人事方面亦都比較簡單，通常嘅派系都唔多，因為通常都係老細（或者一兩個大佬啦）話晒事，多數只係會分親老細派（擦鞋仔）同反老細派（通常係另外嘅大部份人）。相對地，做嘢亦都冇咁多規矩，只要做得掂就算用唔同嘅方法都得。不過又正正因為人少，所以可能好多樣嘢都要同一個人做，基本上就要做到周身刀，不過好彩唔太利都冇乜問題。
大轉細或者細轉大有咩問題？
近年來，經濟環境比較差，多咗人轉工，但又未必係轉入心儀嘅公司。
多數大公司嘅人轉返入細公司最唔適應嘅，多數都係又要一腳踢，又好多野冇人教，亦都冇得跟。
多數細公司轉入大公司嘅人，多數都會覺得淨係做死一兩樣嘢好悶，同埋有啲明明好簡單嘅嘢要比不同嘅大佬改完又改。
其實做大又好，做細又好，都希望大家做得開開心心啦！
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
