地盤佬日誌：風雨飄搖中的地盤佬

平時嘅地盤已經係地獄，落雨要上樓面做嘢係十級地獄。你以為喺戶外做嘢會有雨褸與雨傘嗎？你就想啦，其實得個垃圾膠袋嘅咋（我都知我係垃圾）。

點解唔可以停？

其實而家多數發展商畀承建商嘅建築期都係冇「雨水期」，即係我唔理你全年落雨都好，都要如期交貨。本着錘仔揼釘揼木的精神，所以除非真係大雨到施工唔到或有死人嘅危險，否則所有工人都要如常工作。

落雨釘板扎鐵有幾慘？

落雨嘅時候，雨水慢慢從你個頭頂留到落你隻眼度，雨水溝埋汗水真係超醃眼，你想抹乾淨佢咩？冇可能囉，因為你有黑色的雙手。仲有，落雨濕到衫褲底褲揸得出水係無可避免嘅事，落得犀利嘅話安全鞋入面仲可以裝滿水。呢啲時候特別易跣手跣腳，甚至有可能發生啲不能上報嘅工業小意外。（喺地盤要上報工業意外其實好難，好多人會阻止你）

冷冷的冰雨

夏天落雨雖然密，但係都唔夠冬天時嘅雨兇狠──得幾度嗰陣時，啲雨水會不停喺你個身體帶走你剩餘嘅體溫，所以做幾多體力勞動都會覺得好凍好冰冷，手指尖會有凍到就嚟甩嘅感覺。

香港的建築速度

其實香港起石屎樓的速度可以説係名列前茅，例如法律條件差唔多嘅星加坡，要起一個標準樓層大概要八天，而香港同一個標準樓層大約只需要四至五天。我哋居住緊呢個石屎森林，其實係有一班唔要命嘅師傅用血同汗所建成。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。