地盤佬日誌-食餐好

雖然地盤佬係粗人，不過好多地盤佬都係其實識飲識食嘅。

平時食午飯

雖然有好多地盤都係好山旮旯，好多師傅都迫於無奈要食最難食嘅Van仔飯。不過如果附近有得揀，啲師傅都會揀一啲抵食夾大件嘅茶餐廳或者大排檔。近年連登上面嘅熱門經常出現嘅話題，講地盤佬鍾意食蒸魚飯，呢樣嘢我覺得係真嘅。根據我喺地盤附近成日食飯嘅非正式統計，地盤佬食蒸魚飯嘅比率真係最高，有蒸魚飯嘅茶餐廳，只要附近有地盤，通常啲蒸魚飯都會比地盤佬掃晒；另外仲有樣飯係地盤佬界都係好受歡迎㗎，就係湯飯。聽啲師傅講，做地盤都係為咗養妻活兒，冇得食軟飯（純粹講笑），喺外面日曬雨林做到咁辛苦，湯飯軟啲、易啲入口，又可以食得快可以快啲返去搵俾地方眠一眠（午睡）。

▪ 地盤佬日誌—停工

▪ 地盤佬日誌—風水輪流轉

有老細請食飯

好多判頭老細都鍾意請人食飯，多數係想同上家打好關係請食飯，有時係慰勞啲做得野嘅兄弟。傳說中多所罐頭老細都有一兩間相熟嘅酒樓或者大排檔，多數都會叫幾碟海鮮（通常海鮮都OK貴）加幾碟小炒，不過真正嘅主菜通常都係飲酒。多數啲酒樓老細會傾好咗比佢哋自己帶酒同存酒，有啲仲會比佢哋簽單儲埋月結。不過就算啲嘢幾好食都冇用，因為嘢食都係為咗送酒，多數食完都有人會嘔返晒出嚟。

▪ 地盤佬日誌- 高人工傳說

師傅誕／尾牙／春茗

通常每間工程公司每年都都最少會搞一兩次大型請食飯。以前就多數工程公司都會師傅誕請啲師傅食飯，不過近年越來越多公司唔再搞師傅誕飯。多數工程公司係農曆新年前後都會搞個尾牙或春茗，有啲公司就會自己公司搞一次，請外面啲客搞一次，不過有啲會自己公司同客都一齊搞一次。之前曾經做過一啲大地盤因為不同嘅判頭太多新年前嗰個月差唔多一兩日就要食一次乳豬。

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

檢視此作者的所有文章 

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。