好想同老細講……我哋好憎擾民嘅員工活動
「我哋公司好著重員工嘅work-life balance，等同事有一個快樂嘅工作環境。除咗annual dinner同聖誕party之外，我哋每月都會搞一次活動，星期五放工會去飲嘢，有時周末可以一齊做義工，仲有年度旅行，大家打成一片……」如果你聽到，以為咁就係一間做嘢輕鬆又開心嘅好公司，就大錯特錯鳥。作為公司裏面最低層嘅小薯仔，有時真係好想講：員工活動原意的確係好嘅，但唔好太擾民搞著我哋啦大佬。
Annual dinner
其實，book幾圍枱簡簡單單食一餐咪最開心囉。但係為咗慰勞一眾高層同董事局，硬係要搞到有咁浮誇得咁浮誇，但唔係間間公司都有成隊HR/Admin去搞。當個HR姐姐大住個肚都仲要晚晚OT到10點，然後喊哂口咁求你幫手做committee，又真係好唔忍心唔幫佢。
於是你就要喺忙到嘔泡嘅工作之中，再加上呢個大project──無數次開會、放工要去睇場、因為冇budget要喺淘寶買佈置裝飾、為免俾人鬧要搜羅全部同事都可以用嘅抽獎禮物（但條list永遠俾高層改哂做佢自己想要嘅嘢）、喺lunch time練跳舞唱歌，然後換來show time當晚俾啲高層、同事恥笑你男人老狗扮小鳳姐／Sailor Moon，而啲燒雞同魚翅你掂都冇時間掂。
Team building
好多公司team building嘅背後，又係要逼每team篤一個人出嚟做committee搞。而參加嘅人美其名話出去玩一日，但係嗰日冇做到嘅工作，其實積喺度都係要第二日OT做埋佢；如果喺星期六、日搞，更加欲哭無淚。而且當你啲老細做observer企喺度睇住你玩，就會不其然出現要「爭取表現」嘅壓力，咁又點會玩得開心呢。如果要聯誼同事感情，其實簡單搞吓行山、BBQ、去吓主題樂園已經好開心啦。
員工旅行
表面上好似係自願參加，但暗地裏會同你講：「唔去會有record㗎，自己醒水啦……」或者：「你呀頭都去，你唔係唔去呀話？」如果去日本、韓國、新加坡嗰啲地方還好，去澳門、廣州、深圳嘅話真係貼錢都唔想去。而且有啲話就話係旅行，實際係困住你喺酒店，由朝到晚逼你上training，聽老細吹自己有幾威，或者又要你分group做才藝表演，食飯嘅時候又要同老細夾餸、斟茶、刷鞋，壓力指數由8:00am至10:00pm一直高企。最慘嘅係，旅行永遠都係拍住weekend去，所以變相連續返12日工先有得放假。
星期五5:30pm／星期六全體大會
呢樣嘢簡直係邪惡之最，明明都係開會，聽啲高層報告業績、老細吹水講公司發展方向，點解可以喺工時以外開會而唔計OT錢？以為安排啲所謂team building game，叫啲到會小食就可以包裝成一個party，其實對員工嚟講只係浪費咗半日時間、兩程車錢但無意義嘅額外工作。
延伸閱讀：
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
