將興趣變職業！蛋糕烘焙師分享入行點滴

唔少人都鍾意整甜品畀自己同身邊嘅人食，有時件製成品俾人讚整得靚又好食，真係有好大滿足感！不過，你又有冇諗過將呢樣興趣變成職業，俾更多人品嚐自己嘅心思？

今次Jobsdb就訪問咗今屆Anchor Food Professionals烘焙大賽嘅冠軍──來自Hotel Icon嘅烘焙師彭少如同葉標，同大家分享佢哋嘅入行心得。想成為職業烘焙師嘅你，快啲嚟偷師學嘢啦！

Jobsdb：你哋當初係點樣入行做烘焙師？

彭：好簡單地係因為興趣！我好鍾意整甜品，所以就去咗VTC讀一個包餅課程，讀完之後第一份工就喺酒店餅房到度做囉！

葉：我中七嗰年喺雪糕蛋糕店度做暑期工，見到焗嘢幾得意，師傅就問我：「你有無興趣做呀」，之後佢就帶咗我入行，由一啲屋邨小舖做起，去到做廠，再做到去大型酒店啦！

Jobsdb：新入行嘅烘焙師要識啲咩嘅呢？

彭：除咗整蛋糕之外，烘焙師行業之中仲會分唔同類型嘅專業，好似有啲會做朱古力裝飾，有啲會做糖裝飾。不過香港就比較少人做糖嘅裝飾，朱古力會比較多。

烘培其實係一門藝術。我會建議新入行嘅人可以樣樣都了解咗先，咁就會知道自己想要嘅係乜嘢，然後先再揀自己想發展嘅手藝去專攻。我自己對味道同朱古力裝飾方面比較有興趣，所以就花多啲心思喺呢方面。

葉：大酒店嘅崗位會分得好仔細，例如打蛋糕、起餅位（西餅）、朱古力位……至於細酒店就會周圍走、要multi-tasking，學到唔同嘅野，知道每個工序之間有啲咩連繫。

對於新入行嘅烘焙師，我會建議先專攻一樣，然後再學其他，如果唔係就會每樣都半桶水。

Jobsdb：你哋點樣keep住提升自己嘅烘焙技術呢？

彭：我會上網參考人哋產品嘅造型，同埋整嘅技術等等。多啲學習、多啲睇，就可以提升自己嘅技術。

葉：因為我對呢樣嘢有興趣，所以會keep住去進修；而酒店亦都畀咗好多機會我實習落手做同埋讀書。我個人覺得以前喺街舖同埋廠學到嘅都係基本功，入到酒店先真正學到嘢！

要增加自己嘅實力，首先要有基本功，專注咗一門技術先，同時了解下一步需要做啲咩，等自己對整個流程有個清晰嘅概念。仲要努力啲、學多啲，因為做甜品師傅要有創意，如果唔係會好死板。

Jobsdb：其實行內嘅人多數係學徒出身，定係可以半途入行？

彭：兩樣都有㗎！有啲會好似我咁讀完一啲包餅課程，有啲就可能未接觸過。不過其實就算半途入行都可以，最緊要係有心，因為有心就會去學返人哋學過嘅野，可以追得返人哋嘅努力。

葉：通常都係讀有關酒店嘅科再入行，一啲有資質同埋勤力嘅都會半途入行。

Jobsdb：其實有好多在職人士都好想轉行做甜品師傅，佢哋有咩方法入行呢？ 

彭：最緊要喺市面上視察下呢個行業係點樣先！最好係去酒店炒下散，試下啱唔啱自己先，又或者讀咗啲課程再入行。要提升實力最緊要肯去嘗試，然後要多練習，打好基本功，實力先會好。 另外，亦都可以試吓參加比賽，見識多啲同埋練習吓。

葉：其實入行做甜品簡單，但要入酒店做就難，要人搭人先得。可以試吓一星期喺酒店做幾日炒散，睇下同入面嘅人夾唔夾，再決定可以做邊個位。亦都有人喺求職網jobsDB度搵，咁就會先見HR，見啱咗就會再見大佬或者F&B嘅人。

而家interview唔會叫你即場整蛋糕咁老土㗎啦！其實整餅都要睇Teamwork，要睇你嘅個性同廚房啲人夾唔夾到，因為即使淨係整一舊餅都有好多工序，要識得互相補位。

Jobsdb：一般見甜品師傅大多都係男士，其實性別喺呢行有冇優勢？

彭：以前會比較多見到男士做呢一行，但而家都慢慢開始多女仔。其實男同女都各有長處，男仔會大力啲，處理一啲大煲嘅材料時會比較吃香，女仔就會細心啲，所以各有各優勢。

葉：我見而家男女嘅數目其實都差唔多！不過最大、最高級嗰啲主要都係男士。不過其實都係睇性格嘅啫，男同女做都唔會有好大分別。

Jobsdb：而家食品生產自動化越嚟越盛行，你對於呢個行業嘅前景有咩睇法？ 

彭：機械其實都係要人去操作，而機械用嘅係Programme，同人唔同，就算有機械都需要人去確保製成品嘅質地，所以人其實係比較重要！最重要嘅係人識得變通，但機械唔可以，所以機械係無辦法替代到人。

葉：甜品師傅嘅創意係取替唔到嘅。機械只係可以做到人諗出黎嘅嘢，所以可以取替嘅都只係工序上，而烘培師係唔會因為咁而被淘汰。

Jobsdb：入咗行做烘焙師一段時間，最開心同最辛苦嘅地方係咩呢？ 有咩難忘嘅經歷？

彭：最開心係整完一個蛋糕會有人讚賞！當然唔係每次整嘅過程都順利，難免會有失敗嘅時候，但當我可以從失敗中學習，從而有所進步嘅時候，我會特別滿足。至於呢行辛苦嘅地方就係工作嘅時間長囉，有時要OT成十個鐘㗎！

其實呢次Anchor Food Professionals烘焙大賽係我入行之後嘅第一個比賽嚟，而我真係學到好多嘢！我由知道有呢個比賽就已經開始準備，有試過通宵練習同構思，喺份量、外形上面都用咗好多心機去諗同嘗試，好多時收工之後都會留低去預備比賽，然後第二朝就照常八點返工。

葉：最開心係可以做到一啲你覺得好難而又無諗過會做到嘅野，例如諗新嘅味道啦，而餅嘅design都要不斷嘗試。

收到呢次烘培大賽嘅主題之後，我都準備咗幾個月。最難忘嘅係之前我仲要通宵幫大佬完成一個糖嘅design去參加另一個亞洲區比賽，然後仲要將個showpiece運去會展；嗰排真係好辛苦，但而家諗返又覺得好值得！

二人的得獎作品──Brittany

Jobsdb：最後，有冇咩建議可以畀想入行嘅新人？

彭：我覺得新人呀……要刻苦耐勞啲，而家好多人都可能只有三分鐘熱度。同埋要多啲主動問問題，多啲增值自己。

葉：如果真係想學就一定要用心啦！好多人都想短時間學好多新嘢，但基本功唔去做好。其實我都明佢哋想增值自己，但首先都要打好根基，循序漸進，先可以有進步。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。