有網民在論壇開po問:「有無人試過份reference letter畀舊公司寫衰?聽講遞咗信後,為了封reference letter,就千奇唔好同公司玩嘢,一寫衰就未來職場路就難行⋯⋯」
此問果然引得眾多網友,齊齊分享自身收到推薦信的經驗:
「驚咩?今時今日咁既環境,隨時兩個月後成間公司消失埋啦……」
「法例無規定要寫,唔寫或寫衰都吹唔漲。我有份工離職三年後畀封『離職證明』我。」
「睇邊行啦,我有份工見咗2nd in,因為無張廢紙而無請。」
「記得要分清楚工作證明同ref letter。」
「Reference letter係for寫好野,在職證明係letter of employment,只寫title 同日期。」
「根本封信就無用,未試過見工hr有拎黎睇。基本上interview都係拎住份cv,見到再拎工作/學歷證明。都唔明大家咁在意張廢紙做乜。」
「真正大公司認真做ref check嘅,係搵專門做呢啲嘅第三方公司做。人地會email/打電話去你間u/舊公司問,唔洗你自己交文件, 因為你封信都可以係假。」
「你見到封reference letter寫得衰,都唔會攞出嚟,或者都已經諗定藉口。所以寫衰你唔係最毒,最毒係好簡單。佢淨係留咗聯絡資料,叫有興趣嘅人搵佢,到有人搵個陣先唱衰你。」
有興趣的讀者可睇番原po
▪ 離職倒數清單:由遞信、拎reference letter、清理枱面到刪除個人私隱,按部就班
▪ 遞咗信就冇煩惱?留意合約上的魔鬼細節 勿向老細透露新動向
當搵工已轉入直路,offer在望,怎知臨門一腳卻失諸交臂,皆因一封信累事。這封reference letter,考起不少求職者,對方問起才知自己萬事俱備,只欠這信。有人忘記請求上一手東家撰寫,但更多的是不了解這信的作用。最「大鑊」者,當如樓主所問,信是有了,但因辭職玩嘢,會不會被舊公司寫衰?
工作證明即係推薦信?No,兩份文書大不同,各有功能。相同的是,搵工時,HR或會要求職者出示。另一個相同點,就是兩者都並非《僱傭條例》內規定僱主必須給予員工的文件。即是說,僱主發出是人情,不寫是道理,兼且追討無門。
工作或在職證明,無論英文叫letter of employment,或proof of employment,以至 employment certificate,都是證實打工仔曾在某一公司就職的文件。當中只只列出員工姓名、身份證號碼、職位、入職/離職日期、離職原因等hardcore資料。
這紙文書大致由HR部門發出,員工最好在辭職時一併請人力資源部準備,待last day時取回,乾脆利落。萬一貴人事忙,離職後一段日子才請求舊公司補發,既搞到別人亦麻煩自己。
若然不想搞到上手東家,或因離職原因寫明被炒而不宜曝光,或資方不肯出工作證明等。Don’t worry,書面僱傭合約、糧單、強積金供款紀錄都可證明你曾在某公司任職。
▪[求職攻略]教授推薦信範本(Job recommendation letter from professor)
▪ Letter of Recommendation for an Employee
推薦信reference letter,通常由打工仔邀請熟悉他在職表現,並且關係良好的人士撰寫,如直屬上司。內容比工作證明「軟性」得多,會述說該位員工的工作能力、態度、個性等,供下一手僱主參考。有名你叫「推薦信」,內容以唱好居多,明示暗示信中主角值得推薦。
若然和阿頭關係欠佳,就算對方肯為你出封reference letter也恐怕會寫花,但又想有封推薦信傍身,可找同一團隊的高層同事,或合作過且關係良好的其他部門主管出手。
幾多封推薦信至夠?吓,一封已諗爆頭找誰寫,還要來多封?!曾有網民呻:「啱啱收到個offer,不過話要兩個reference⋯⋯」為保險計,預備兩封最穩陣,一封是新鮮熱辣剛離職公司的上頭;另一封找再上一份工的supervisor,太陳年的就無謂了,至於Fresh grad搵老師寫就最就手。
會不會被舊公司寫衰推薦信?其實reference letter都是官樣文章,要寫衰一個人也要花些心血精力,正常人豈會浪費時間。除非員工犯下大錯,或者同公司玩嘢,要他永不翻身。假使真的手執一份內容不符心水的「推薦信」,那便放在櫃桶底,不見天日。講真,申請一般公司一般職位,推薦信並不是must have。正如很多網友都說:「這是張廢紙。」而需要認真查看這張文件的,以公營機構、銀行、學府等「執正嚟做」的組織為主招募的,多是高薪厚職的精英,所以各位亦不用太擔心。
大機構請良才,須「執正嚟做」的話,又怎會盡信一紙文書?如同網友所言,它們大多會聘請第三方動真格fact check。縱使是普通公司,也會採用簡單直接的方法,如打個電話給求職者的前上司,便可求證CV上的資料孰真孰假矣。
Jobsdb小提示:如果找不到適合人選寫reference letter,也請勿自己亂作,蒙混過關行不通,使用虛假文書可是刑事罪行來的。縱使離職原因是被解僱、和上司反面和公司反枱⋯⋯倒不如硬着頭皮和HR/未來僱主坦言推薦信從缺,或者不去應徵須有reference letter的工,總好過弄虛作假。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。