我做Marketing：職場上的樽頸
樽頸，一個樽最窄嘅位置，只要穿得過，自然海闊天空。
但鬼唔知咩，好多人就係穿唔過，然後不進則退，或者成世人都停留喺呢個揸頸就命嘅兩難之中。
職場頭五年，好少人會話自己處於樽頸，因為頭五年應該係成長得最快、四圍吸收知識同經驗嘅時間；
進入職場第五至十年，事業上稍有所成，幸運嘅話，仲已經成為經理，開始管理下屬，甚至開始享受辛苦工作帶畀自己嘅成果；
進入職場十年之後，有人開始覺得自己嘅工作（或者做嗰行）其實每年每月每日不斷重複，無甚意義。想搵過另一份工，或者轉行？又無勇氣、無動力，日復一日咁過，意志不斷被消磨。每年加人工，再無好似以前跳槽時20%以上增長，做緊嗰間公司要再升上最高層又好似遙遙無期。上唔到，又唔想落，樽頸也。
▪我做Marketing：職場交叉點：同事犯錯，你會唔會出聲？
以下同大家介紹阿英，一個職場樽頸嘅寫照。
阿英，三十五歲，喺一家外資銀行做 marketing ，人工中上，福利優厚，年假22日，公司醫療、牙科保健多到用唔晒，而且經常有 business trip 飛歐洲，所以喺好多朋友眼中，阿英呢份絕對係優差，而阿英一做就十一年。每次朋友聚會，大家各自 update 近況，阿英都會話「都係咁啦，不過不失」，然後就無咩好 update。
最近，阿英同我講佢有啲想轉換工作環境，但又唔知轉咩好，又驚轉咗無而家咁好，支持唔到而家嘅生活水平，處於一個內心尷尬、掙扎嘅局面。
我嘗試同阿英分析，而家「不過不失」嘅狀態可能就係佢感覺矛盾嘅原因。
「『不過不失』代表你而家工作同收入都好穩定，所有嘢都可以預測。當你生活相對無憂，亦即無誘因同迫切性要你向前行，探索新環境。慢慢你就停留咗喺自己已有嘅 skill set，繼續將自己困咗喺呢個 comfort zone 入面。一個『不過不失』嘅環境，其實可以好危險。」
阿英聽完之後若有所思，我再補充：「當然，各人有各人嘅取態、各人有自己嘅生活節奏同追求：有人鍾意安安穩穩、『不過不失』，貪佢無咩壓力；又有人鐘意尋求挑戰，磨練自己，不斷迫自己進步。
你而家有一個尋求轉變嘅心，某程度代表你覺得自己不止於此，仲想睇多啲出面嘅世界。當人面對新環境，要同新相識嘅人合作溝通，自然會成長，學習到新技能。」
職場上，樽頸並唔可怕，最可怕就係你害怕轉變嘅心態。
大多數自覺身處職場樽頸嘅人，其實都擁有一定經驗同地位。嘗試相信自己嘅 judgement 同自覺，逐步逐步探索自己未被發掘嘅能力，咁先可以擴大自己嘅 comfort zone。
我做Marketing
由Michael及Derek兩位marketer創立的「媽劇停」平台。撰寫市場及職場文章。經常與不同機構及院校合作舉辦marketing及職場講座。著有《我做媽劇停》及《暖男之道》兩書。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
