打工仔連環不幸事件──見工中伏篇

過年出完花紅後全世界都爭住搵工，打工仔一聽到有公司打嚟約interview，梗係不顧一切衝上去見。但唔好彩遇上黑心公司以招聘為名，其實拋磚引玉抽你水，真係會好鬼無奈。騙徒手法層出不窮，大家又有冇遇過以下中伏經歷？

我哋請到國際招聘咨詢顧問公司米高蒲志（Michael Page）Regional Director Howard Chan俾啲意見打工仔，搵緊工嘅大家唔好喊啦！

1.「上嚟傾吓偈」伏

有冇聽過公司叫人上嚟面試，原來其實根本唔係諗住請人？小編朋友嘅公司就試過，本來一早已經內定咗會請老細嘅朋友，但又登廣告、又約咗幾個人上嚟見，等其他人以為佢哋係做足招聘程序；而俾佢哋昆咗上嚟面試嘅人，就好慘咁免費幫佢哋做咗一場戲。亦有聽過某公司見完之後，竟然話：「其實我哋只係想傾吓偈，睇吓出面啲後生仔諗乜。」聽完真係想即時反枱！

專家點評：其實呢個情況真係好難預料，作為求職者，只可以隨時保持100%狀態去見工。可能間公司見到你咁勁之後，決定請埋你添呢！

▪ 防伏措施：由apply去到見工 360度睇呢啲辨別伏工

▪ 伏工勝地？勞工處網頁招聘廣告門檻低多人睇，待遇卻十分參差

2.「招聘公司亂send CV」伏

好多時招聘公司的確係搵工嘅好幫手，又可以提供到好多行內資訊俾你。但樹大有枯枝，個別招聘公司可能為咗要達到某啲target，例如每星期要安排到幾多人去面試，而將你份CV亂咁send出去俾客，而你其本根本唔適合嗰份工，但係又去咗見，嘥哂你啲時間。

專家點評：求職者要識得保護自己私隱，選擇具知名度、信譽良好、成立咗一定時間嘅招聘公司，作為搵工伙伴。

3.「侮辱式壓價」伏

有啲求職者一入面試房就俾人插到上天花板，又話唔係讀三大，又話冇經驗，又話呢樣唔識嗰樣唔識，甚至話你個樣唔得（女小編俾人話過哨牙……），係差未問候埋屋企人。等你自信心崩潰時，就將你嘅expected salary壓低三分之一。

專家點評：求職者遇到呢啲情況絕對唔可以表現懦弱，應時刻保持自信、禮貌同專業態度。況且有啲公司的確會刻意刁難，考驗求職者嘅EQ同反應。

▪ 見工迷思：面試後為甚麼遲遲未有回音？

▪ 合約與長工只差一個字﹗入職簽約時睇清條款免中伏

4.「水你寫proposal」伏

聽過一啲個案，公司聲稱想測驗求職者嘅能力，叫你針對業務發展或宣傳策略寫份proposal或report俾佢。事後份工石沉大海，但你辛辛苦苦交出嚟嘅功課，就唔知俾佢攞咗嚟做乜。

專家點評：記住間公司一日未請你，都唔應該向對方透露敏感資料。

5.「突然轉合約制」伏

原本招聘廣告寫明有幾多福利，點知見工時突然話因為人手問題，要你改做contract制，博你冇問清楚就簽。到你入咗間公司，先發現原來福利同permanent staff唔同就太遲啦！（小編以前都係咁而俾人水咗一日大假……）

專家點評：一定要睇清楚、問清楚先好簽囉！

延伸閱讀：

正確請假Email／訊息寫法大全

［問到口啞啞］見工壓你價口術大全

Son姐教路：七日通知期、無醫療保險是伏工嗎？

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。