近年掀起一陣「文青風」—文青女神、文青打卡景點、文青look,樣樣都係文青。個個都文青,唔通個個都係文青咩?文青,即「文藝青年」,他們大多都熱愛文藝,愛好閱讀、電影和音樂;熱愛生活,喜歡攝影、旅遊;不願隨波逐流,有自己一套堅持的想法和品味。如果你自認為係文青,就要留意以下幾份好啱文青返嘅part-time job啦!
Coffee Shop/Café 兼職店員
喺忙碌嘅生活當中,走入一間靜謐舒服的Café,食件cake,飲杯咖啡,拎本書出嚟細細咀嚼,絕對係唔少都市人追求嘅生活!而近年多咗好多「文青Café」,等一眾想靜落嚟感受生活嘅人有地方歇一歇,所以喺Café返工對文青嚟講絕對係一大樂事。工作不外乎係幫手沖咖啡或者飲品,出吓嘢食同執枱,報酬不錯,重點係工作環境舒服,可以放慢生活急促的腳步,唔使趕之餘,又可以學點沖咖啡,啱曬啲鍾意悠閒又對生活事物充滿好奇嘅文青。
工作地點:各大小咖啡店
時薪:$45-$60
藝術展覽兼職helper
對於愛好藝術嘅文青,可以考慮各種藝術展覽helper工作,例如每逢藝術月3月尾舉行,最出名嘅Art Basel巴塞爾藝術展同Art Central,兩個大型藝術展都需要大量人手應付,主要幫手解答入場人士的疑問,控制人流,提醒入場人士要正確對待展品等。工作算簡單,人工又高,最緊要係可以邊返工邊欣賞埋個展覽,連張門票都慳番,浸淫喺藝術氛圍之中,打工都開心啲啦!Art Basel將會喺來年3月29-31日舉行,而Art Central就會喺3 月27-31日舉行,所以有興趣嘅話記得mark實日期,到時提早apply啦!
工作地點:中環海濱活動空間(Art Central)、會議展覽中心(Art Basel)
時薪:$60-$80
藝術館part-time ambassador
除咗上述的年度大型展覽,平時有不少藝術館或博物館都會請ambassador,如果你自問溝通能力好,又夠耐性serve客嘅話,呢類工作好適合你。其工作內容同展覽helper大同小異,可能比較需要follow真實展品嘅情況,檢查及報告有否損壞。此類工作嘅好處係可以長期返,比較穩定,但始終不及大型展覽忙同急需人手,人工自然相對較低。
工作地點:藝術館、博物館、展覽廳
時薪: 約$55
書店兼職助理
最接近書、被書包圍嘅地方一定係書店,如果喺書店返工就可以日日同書做朋友,對於一班鍾意睇書嘅文青,真係最幸福嘅事!書店assistant嘅工作多數係整理及陳列書籍、收銀及管理書店物資等等,工作都算輕鬆,但若果返細書店一個人要顧全成間鋪可能比較忙同需具獨立個性。另外,書店人工一般較低,但勝在可以接觸到更多書,長期被書本簇擁住,真係全身都會散發陣書卷味,更加有文化氣息。
工作地點:各大小書店或書局
時薪:$34-$45
Part-Time寫手
如果係鍾意文字,喜歡寫嘢,又有一定文字功力嘅文青朋友,可以搵返文字工作類嘅part-time。唔同公司都需要對外發布消息或宣傳,但好多時候公司內部工作忙碌,未必會有時間或有專人處理一些文稿工作,因此會請part-time寫手幫忙撰寫文案。寫手只需按時依照公司嘅要求完成文章即可,非常flexible,多數可以home office工作。但同時好考你嘅自律性、時間管理,同能否於壓力下工作,因為需要適當安排好工作時間喺截稿前完成,否則就會搞到「笠笠亂」。
工作地點:office/home office
時薪:難以時薪計算,多按文稿字數及公司offer的稿費而定。
社交媒體兼職小編
同part-time寫手一樣,很多公司在宣傳上都很落力,尤其近年社交媒體盛行,不少公司紛紛開通Facebook、Instagram等社交媒體官方帳號,並招請part-time editor幫忙管理,定期出post做marketing宣傳。而呢類工作最適合「瓣瓣掂」嘅文青,因為好多時候喺social media出post嘅內容好多樣化,不單只出純文字嘅post,好多時候仲要出片同整圖做promotion,無「周身刀」都難以應付,所以啱啲識攝影、拍片同剪片嘅文青。甚至要熟悉社交媒體運作、有敏銳觸角同了解社會時事變化嘅朋友。呢類兼職技能要求較多,但人工亦相對較高,而且工作內容會比較有趣,有啲公司仲容許home office㗎 !
工作地點:office/home office
時薪:$50-$100 (視乎經驗)
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。