新僱主要求提供推薦人，點揀先最明智？

好多較大型嘅招聘機構請人時，都會要求應徵者提交一至兩名推薦人嘅名字，通常被揀選嘅推薦者係應徵者以前嘅僱主或老師。遇到呢類情況，要點揀選推薦人先係最有利？

揀選學校導師，學科與工作相關

畢業生還未有任何全職工作經驗，在揀選推薦人時，通常會選擇學校導師。如是大專或大學畢業生，最好揀選與申請職位相關嘅學科導師。若然所申請的工作並沒有相關的選修學科，可考慮學科成績較佳或曾在該學科獲得大躍進的導師作為推薦人，因為導師可藉著應徵者嘅學術成績推薦，說明申請人勤奮好學，提升獲聘競爭力。

揀選服務年資最長或交情甚篤的上司

若然已有一定年資嘅打工仔，那麼較有利嘅推薦人，當然係選擇服務年資最長嘅公司老闆或上司，一來佢哋對應徵者嘅背景同工作能力較為熟悉，而且舊僱主一般都滿意員工表現，才可合作多年，所以舊老闆如被邀為推薦人，通常都會美言幾句。若然臨走前搞到不歡而散，那麼就選擇交情最好嘅上司，當然共事時間不能過短，至少有一至兩年以上。切勿揀選合作幾個月嘅上司做推薦人，招聘機構很可能質疑他們的可信度。

揀選推薦人時應注意事項

打工仔切勿等到見工時，先臨時臨急求其寫幾個推薦人，因為被「點名」嘅推薦人唔係有義務為你效勞，唔好當老馮咁未問准舊老闆或上司嘅同意，就私底下將人哋嘅聯絡資料交俾招聘者，咁樣做係絕對唔尊重別人嘅行為。

應徵者喺求職期間，應在見工前問定幾個你屬意嘅推薦人，親自打電話聯絡以表誠意。話俾佢哋聽宜家你嘅搵工情況，並誠邀佢哋擔任你嘅推薦人。萬一佢哋因私人理由拒絕你，都要禮貌地打完場。要知道，呢個世界好細，話唔定未來僱主同你嘅舊僱主有交情，得罪舊老闆嘅話，真係仕途堪坷喇﹗

雖然有唔少僱主現已透過社交網站查核應徵者嘅背景，但仍有唔少招聘機構透過舊僱主（特別係最近一位）了解應徵者嘅背景。無論你打咗幾多年工，同每位僱主都好聚好散，先可以「儲」到更多理想嘅推薦人，對前途自然更有利啦﹗

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。