地盤佬日誌—給新入行地盤佬的小建議

每個人都有新入行嘅時候，等我呢個係自認地盤老pat pat，嚟講一啲比新入行地盤佬簡單嘅建議呀。

去廁所嘅問題

對於地盤嘅所有人來講，去廁所嘅問題從來都係最大問題。做管理層都相對地好啲，因為寫字樓通常有個相對地乾淨嘅廁所；真係落場做嘅師傅就麻煩啲，因為真係冇一個正常嘅可用嘅廁所。

所以唔想入超臭廁所或者冇遮無擋咁屙屎的話就最好：

1. 注意食物衛生，唔好肚屙（貨車飯盒真係要小心）

2. 返工前或去食飯要屙清屎

▪ 地盤佬日誌—地盤最重視嘅節日

▪ 地盤佬日誌—為咗工程你可以去到幾盡？

人際關係

做地盤做嘢真係做野唔難（開始時幾難都好，做多幾次就唔難），地盤人多，包括上家下家行家對家，對每個唔同人都要有唔同嘅方法，人際關係先係最難。

1. 識人好過識字

2. 就算對啲咩職位人嘅都要禮貌（例如籠lift阿姐、保安等等係重點）

3. 對某啲人要惡，對某啲人要氹

4. 唔好借錢俾地盤任何人

5. 盡可能都要對事不對人

▪ 地盤佬日誌—停工

▪ 地盤佬日誌—風水輪流轉

大道理

其實做地盤真係好唔穩定嘅職業，所以好天一定要劈埋落雨柴，可以的話儲多少少錢，有老細你返多啲工O多啲T都盡量做，因為有陣時做完一單工程之後真係唔知要喺屋企坐幾耐先至有下一單。

工程的老闆和其他行業一樣，都係衰人多過好人（好人做生意多數執笠），遇到好老細真係要俾啲心機去做，做嘢真係要出盡全力唔好得過且過，咁樣好老細下次有工程先至大機會搵返你，大家都長做長有。

有啲嘢如果自己冇信心覺得有危險就唔好做啦，唔係其他人做到就代表你一定做到，所有嘢都要量力而為。

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。