準備好融入新公司！轉工、新入職同事如何趨吉避凶？
每年嘅第一季，通常都係出花紅嘅時候，如果公司有咩升遷安排，好多時都趁年結過後，埋單計數，論功行賞，順便畀同事加官晉爵。然後呢？然後，大家冇咗「等升埋先」同「等派埋 B 仔先」嘅機會成本，想轉工嘅，就可以爽手地遞信。你，會唔會係其中一個？雖然香港 2020 年嘅市道受疫症影響而相當麻麻，但係如果你咁好彩有 offer 仲要簽埋約，咁我就梗係要恭喜你啦。話時話，有冇留意到 job offer 人工增長咗幾多？嗰嚿錢，我向來有個稱呼：「 risk premium (風險溢價) 」。
因為，轉工代表你離開熟悉嘅地方，投奔一個你好可能知啲唔知啲嘅新環境。你老細可能係面試嘅時候初相識 (比較幸福嘅會係舊公司老細帶埋你過檔，但呢啲機會可遇不可求) ，而其他合作嘅同事，十居其九生面口。空降到新公司嘅你如何安全著陸、迅速融入？筆者見過唔少成功同撞板個案，可以同大家分享下。
▪ 失業搵唔到工點算好？10個低成本創業及搵錢Idea兼成功例子
▪ 人工10年前後對比：IT、會計、Marketing入門級職位 升幅最少係佢？
首先，第一件事，真係講 first impression 。需知道，喺新公司入面，除咗你，其他都係舊人。日復如是咁工作，難得有新人加入，當然會細意打量下。你著得正正常常還好，如果有啲太過標奇立異，令人印象太過深刻，難免有同事會「以貌取人」，未見到你嘅工作能力，就已經對你產生偏見。
所以，返新工，拜託，衣著打扮務必整齊得體，唔好 over 到尹光登台或者去囍宴咁，但亦唔好求其到令人覺得你唔專業。
我見過有新同事， middle management ，第一日返工著深藍色西裝再襯件黑恤衫，冇打呔，加埋佢本人高大健碩嘅身型，唔知點解硬係有種江湖味道。如果可以的話，我都係建議 day one 打安全章，以一般文職為例，男嘅白恤衫打呔，加上一套企理深色西裝；女仔唔係事必要著套裝，普通斯文打扮都大致可以。等你坐暖咗張凳，同同事混熟咗，到時你要展現返個人衣著品味都唔遲。
另外，除咗衣著，談吐舉止都可以有好大影響。喺舊公司，我見過有新嘅 team head 啱啱返工就侃侃而談，吹噓自己識邊個、做過啲乜咁。
其實呢，都 2020 年咯，好多人喺你返新工之前，已經會做下功課，透過社交網絡或者其他途徑去探聽你呢位新人嘅經驗甚至事跡。換句話講，大家對你都可能有一定嘅期望。
喺大家未建立合作關係同信任之前，保守少少，謙卑少少，平實地介紹下自己， welcome lunch 嘅時候講下自己鍾意食啲乜或者有咩嗜好，都有助你同其他同事和睦共處，日後慢慢用工作表現話畀大家聽你有幾多斤兩都唔遲。
更加重要嘅係，你以前做嘢嘅一套，未必適用於新環境。喺未了解新公司嘅權力分佈 (即係有啲咩人唔可以得罪) 之前，太快賣弄自己嘅見識，太急於想施行自己嘅方針，絕對影響你同其他同事嘅合作。
▪ 職場流動人口8年增逾4倍！想轉炒散/自由工作/Slash有咩要考慮？
作為新同事，對公司、行政或者規矩上有好多疑問，都好正常。一般嚟講， HR 都會簡單介紹返啲基本嘢。我知道大家都會好想問一啲貼身嘅問題，例如話「大家平時幾點收工？」，「有冇得 work from home ？」。
不過，呢個世界尋求答案嘅方法有好多，其中一個方法，叫觀察。同樣地，呢個世界自曝其短嘅招式都好多，其中一招，叫問錯問題 — — 尤其是，喺唔適當嘅時候。
試諗下，一間公司請新人，其他同事嘅合理期望係新同事會分擔下啲工作量。但如果你喺合作初期就已經擺出「唔多想撈」、「好想快啲放假」嘅姿態，大家應該都唔會太鍾意你。
總而言之，「新嚟新豬肉」，收拾興奮嘅心情，放低自己嘅身段，以四平八穩地順利過渡到新公司、新團隊為目標啦。
撰文：職場心經
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
