暑期工中伏實錄(2)：這間書店很古惑

主角：阿明，應屆DSE畢業生，為人懶洋洋，一心打算搵份Hea工過吓日辰
老闆：阿黑，年年都搵學生哥做免費勞工博命收書
地點：油麻地唐樓樓上書店

阿明喺IG上睇到「小白書店」正在招聘店務助理，工作內容係：「看舖、執書、賣書、輕鬆賺錢，增加文藝氣息。」心思思，有件事，於是就上門應徵，滿心以為：書店嘛，哎喲都叫文字工作相關，一定好正氣，唔使怕受騙。

書店嘅位置好隱蔽，千辛萬苦先喺油麻地殘舊工商廈中搵到招牌。阿明行入間舖，老闆自稱阿黑，面試時無問一句個人興趣、能力、工作經驗等常見問題，反而集中問：「我為人黑白分明，好簡單。問你兩條問題，啱就請，唔啱就唔請。你有無中學師弟妹嘅聯絡資訊？同佢哋關係係咪良好？」

或者係阿黑開場白好真摯，講嘢又霸氣，阿明直覺佢就好似《城寨英雄》裡面啲義氣仔女，突然好想做份工，縱然未知工作內容同人工。神推鬼使之下，佢直接回應問題：「我之前打波都識落好多下屆，都叫熟熟地。電話就學校內聯網可以搵到，或者問人都好易拎。」

「恭喜你，啱我心水。聽日返唔返到工？朝十晚七。」阿黑豪爽講道。

阿明非常雀躍回應：「好啊！」

------

第一日返工，本來想問清楚人工等資料，阿黑已經快閃3秒交低工作內容，瞬即消失。阿明被安排整理教科書列表，細數書店內現有各科教學書數量，全日忙到暈頭轉向。

第二日返工，繼續執書，將教科書分類，人手畫海報：「高價收書」，直到收工，都見唔到阿黑。阿明厚臉皮地詢問同事人工點計，得到答案：「你要問返阿黑㗎！」

第三日返工，嚟料啦！阿明鼓起全身心勇氣，截停阿黑問出糧詳情。阿黑笑講：「你呢兩日做得好好，將所有教科書整理得好好！我非常欣賞你工作態度認真，肯做肯捱，唔計較。我睇好你啊，想以合伙人形式同你合作，嚟緊就由你負責晒成個收書項目。」阿明初頭聽，仲滿心歡喜，自覺被睇重。

豈料阿黑續道：「你召集師弟妹賣書畀我哋，每收一本書你就賺返20%差價做佣金，收幾多本書就拎返幾多錢，對大家都公平。不過我又唔方便拎一大舊錢畀住你先，為咗方便大家做嘢，你出去收咗書先，每日收書返到鋪頭，公司再一次過找數畀你。」

美好嘅假象喺講到錢呢刻，就現形喇！阿明突然間醒覺：即係無糧出，要自己貼錢去收書先？結果當晚回家，同朋友商量後決定辭職。第二日打電話畀阿黑，想追討返兩日人工，但阿黑一口拒絕：「一本書都無收到，仲想拎錢，你係咪恰我份人簡單善良？」

炒散行情最新最快﹗

兼職、短期工、臨時工、Freelance，自選工作模式，最新空缺情報盡在此﹗

NG事項

1. 工作內容唔清唔楚

面試過程中，無論老細開場白有幾真摯、霸氣，都要保持平常心，理性地問清楚工作內容。「請問具體嘅工作內容係咩？返工時間係幾點至幾點？一星期返幾多日？」即使只係暑期工，都係一份工，作為應徵者一定要搞清搞楚工作內容，切忌唔知頭唔知路就返工。

2. 唔使唔好意思，人工幾時都最重要

唔知點解，人類有時講到錢就會唔好意思，硬係開不了口。但打暑期工為咩先？除咗攞社會經驗之外，其實都係想靠自己賺返個錢！所以無論幾時，對住邊個，包括面試官、經理或老細，喺接受相關工作前一定要搞清楚：「具體人工係幾多？時薪係咪高過最低工資？超時有無補水？出糧時間係幾時？出糧方式係現金、支票定銀行轉帳？有無供強積金？」

3. 公司要求墊支費用要Say no

明顯騙案呢，就會喺開工前要求應徵者付費完成某類課程後才可工作，但今時今日，騙案又點會咁易畀你睇通睇透呢！騙徒手法層出不窮，好似阿黑咁，轉個彎叫你自己墊錢先，其實咪又係貼錢打工！所以暑期工必定要謹記，千祈唔好預付任何費用。當遇上呢啲工，唔使諗，即時Say no！

4. 返兩日工都要出糧

首先，香港地《僱傭條例》其實無分咩暑唔暑期工，總之打得份工就屬於僱員身分，可以享有《僱傭條例》所賦予嘅福利同保障。

然後，僱傭合約可以係以書面或者口頭方式訂立。僱員就算無簽署過書面合約，依然受到《僱傭條例》嘅保障。但為咗保障雙方權益，僱傭合約當然最好係白紙黑字，並經雙方簽署作實。

最後，準時發薪畀僱員係僱主嘅法定責任。無論係全職、兼職、暑期工、散工或替工，僱主必須在工資期屆滿或在僱傭合約終止後七天內支付人工。

年輕人初次投身社會，唔熟悉勞工法例同自己嘅權益係好正常，所以有疑問嘅時候，一定要多請教有工作經驗嘅前輩，千祈唔好隨便答應人哋嘅要求！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。