港版校對女王：浪漫真文青

日劇《校對女王》入面飾演河野悅子的石原聰美每日返工都襯到啲衫靚一靚先返工，做佢同事就日日好似睇fashion show咁，都係一件賞心樂事！咁香港嘅出版社編輯，又會唔會好似佢咁，日日都咁好心機打扮呢？小編今次就訪問咗一間老牌出版社嘅輕熟美女編輯Anna，了解一下呢個咁文青嘅工作到底係有幾咁文藝！

出版社編輯 可能係最浪漫嘅工作

出版社編輯一般比較沉靜，唔多嘢講，要搵到一位願意接受訪問嘅編輯一啲都唔容易，Anna都話可能係老牌出版社啦，大家喺office都比較靜，成日唔出聲都得㗎。「我大學主修語文，畢業後唔想教書，就向文字工作方向搵工。當初都無諗太多，in咗幾份工，好順利咁收到出版社編輯呢個offer，就入咗行啦！」

「曾經有一個港漂朋友同我講，話佢覺得喺香港做出版社出書係一件好浪漫嘅事，因為人工比較低，喺同一間公司做幾年，人工都唔會點加，一定係好鍾意做書，先會堅持得到。其實我無諗過份工浪唔浪漫，不過的而且確，如果要養妻活兒，呢一行就真係難少少。可能因為咁，我啲同事大部分都係女仔，而編輯們都係自細就鍾意睇書，所以睇字速度非常快㗎。」

校對女王 要有搵作者嘅sense

雖然石原聰美喺日劇入面走在時尚尖端，但大家唔好誤會現實中嘅編輯們返工都扮到靚一靚，就算有，都係少數。「我啲編輯同事衣著都比較樸素，有啲著牛仔褲加無印Tee，有啲就著淨色棉質麻質連身裙。始終我哋返工唔需要見客，對住電腦打字同睇稿，都唔使咁靚，舒適同方便最重要。不過我自己就比較貪靚，鍾意日系甜美風嘅裙，同埋會化淡妝，打扮得靚啲，心情都靚啲啦！」

咁到底出版社編輯係要做咩嘅呢？「我嘅日常工作都係圍繞住出版書籍，所以我將工作分三部分，包括一本書誕生前、編輯中，以及成書後去解釋畀大家知啦！」

「首先，喺一本書誕生前，編輯需要去搵有potential嘅作者，包括有寫開嘢或者未有任何作品但有寫作題材嘅作者，例如一啲有特別職業、不平凡經歷嘅人、名人明星等等。聯絡到有興趣寫作或者畫繪本嘅人，我哋就會同佢哋傾吓大方向、全書結構同分章、重點寫啲乜、有啲乜係讀者未必有興趣睇等等。當然都有唔少人主動投稿，我哋睇過啲稿之後，如果覺得唔錯，都會約見投稿人㗎！」

做編輯 多少有點文字潔癖

「第二部分係編輯中嘅階段，其實呢個階段可能會好長，長達一年都唔出奇，主要睇寫作速度。始終香港而家全職寫作嘅人唔多，大部分人都係一邊做全職一邊寫作，好忙㗎！我哋就要好似老師追學生交功課咁，時不時要追稿，畀壓力作者寫嘢啦，如果唔係，真係有排都出唔到本書㗎！」

Anna話做編輯，某程度上都有文字同格式潔癖，即係幾萬字稿，睇N次，確保無錯字之外，仲要統一所有字體大小、字型、異體字、用字等等，總之要金睛火眼！「作者交稿初期，會來回改好多次，直到文字風格統一咗，作者上手之後就一路等到齊稿，齊稿之後我哋先由頭到尾執同整理，編排好哂，再試下排版、確定design、做書封面、諗文案等等。」

「到最後本書落廠印刷，我哋就需要睇藍紙，確保無問題先大批印刷。印好之後就要做一系列宣傳工作，我哋公司可以話係無Marketing呢個部門，所以我哋都會做埋，出吓Facebook post，或者同書局做新書發布會、搞吓作者講座等等。」

Anna話佢都好enjoy日日對住文字㗎，嗰期做開咩書就會大大增加嗰方面嘅知識，例如心理學啦、營養學啦、中醫理論啦、哲學啦、股票投資啦⋯⋯「都好開心㗎，一邊返工一邊學好多新知識！唯一唔太好嘅，係對眼真係會好攰，我又貪靚，戴con返工，頭幾年都唔使滴眼藥水，而家真係眼乾到唔滴唔得，可能再過幾年都要屈服，戴眼鏡返工啦！」

紙媒係夕陽行業，無生存空間？

香港嘅閱讀風氣唔算好濃厚，而且大家都習慣用電話睇片、睇文章，愈來愈少閱讀紙媒，好多人都覺得出版係夕陽行業，Anna又點睇呢？「的確呢一行競爭都幾激烈，好多死書賣唔出，最後都係裁書脊之後廢置。但紙本書一定有生存空間，首先書本經過編輯出版，當中嘅理論同知識都相對有質素；而紙本書亦係方便學習嘅形式，讀者可以用筆做記號、可以貼memo等等。所以我相信只要人類社會仲存在，就會有書。」

（圖片來源：校閲ガール／NTV）

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。