爵爵&貓叔專訪（三）：堅持黑白、祼體、流血、第三隻腳
上回講到爵爵同貓叔為咗塞住阿媽把口而開始畫圖，結果食足八個月穀種，淪落到要問人借錢同兼職做bartender維生……經歷過呢段咁辛酸嘅奮鬥史，佢哋對創作之路有咩體會？
去廁所衝出創作瓶頸
小編：你哋由2013年出道至今，大大話話都畫咗3年圖，有冇遇過創作瓶頸呢？
貓叔：成日都有㗎啦！咪去瞓覺、打機囉。
爵爵：我係去廁所……
貓叔：（好認真）我要搵到一個空間，可以完全休息，脫離自己做緊嘅嘢。如果合埋對眼，個腦仲係咁諗住嗰樣嘢，根本休息唔到，咁係唔work嘅。
爵爵：吓～唔係喎，我反而係瞇埋眼諗就有靈感喎。
貓叔：……得啦，唔該。
堅持黑白、祼體、流血、第三隻腳
小編：咁俾啲客ban稿嘅時候又會點處理？
貓叔：唔做囉。
爵爵：唔係嘅，睇吓佢ban咩先……
貓叔：（霸氣mode）你可以話我哋有性格，我對住啲客，係會堅持黑白、祼體、流血、第三隻腳，最多只可以減一樣嘢，但要我全部減哂係唔得嘅。
同埋你要話俾我知理由係乜嘢。如果你話係喺商場，要親子樂嘅，唔想有第三隻腳出現，係可以接受嘅理由；但如果你只係話老闆唔鍾意，又講唔出理由，咁你做咩要搵我啫？我咪介紹其他插畫家俾你囉。
爵爵：如果佢要改咩都跟佢意思，長遠合作會出事，做咩都要睇佢心情，所以寧願唔同佢合作。
貓叔：有啲人覺得插畫界好細，係咁搶生意，但我覺得唔係。每個插畫家都有自己嘅特色，公司都係想搵返個配合到自己風格嘅插畫家。
我手畫我心 勿忘初衷
小編：「JieJie & UncleCat」專頁粉絲就快突破40萬，你哋最希望自己嘅作品可以俾到啲咩俾讀者呢？
爵爵：「台港大不同」係我哋嘅出道作品，但我哋唔想俾呢個題材框住自己。我哋作品嘅目標就係想人笑，帶俾人正能量。就算講啲好負面嘅時事話題，都將佢變到好好笑，等大家可以苦中作樂。
貓叔：另外亦想成為台灣同香港互相溝通、了解嘅橋樑，等大家多啲關心時事。例如有時香港嘅新聞，台灣未必會報導，唔少台灣朋友係喺我哋個專頁度睇到。
爵爵：希望大家睇完、笑完之後，都有啲反思啦！
小編：你哋不時會畫啲同時事有關嘅題材，其實有冇擔心過會受到壓力？
貓叔：其實前年已經發生過，有次發表咗一啲言論之後，突然好多出版商唔同我哋合作，個專頁仲一時之間冇咗3萬個fans。
爵爵：仲收到一啲留言，話對我哋好失望添！
貓叔：你問我當時驚唔驚？我好肯定咁講，我真係驚嘅，因為除咗俾人「dislike」，仲有一啲大客戶，本身己經傾到就快開工嘅階段，點知即刻取消合作。當時真係損失咗唔少收入。
但我哋唔覺得自己做錯。大家都有唔同嘅意見，我哋咪理性啲討論囉。作為一個平常人，我都想表達自己嘅意見，點解唔可以喺自己個專頁度講呢？我問心無愧。
爵爵：其實我覺得最重要係隨心而行，當你表達到你真心嘅想法，其他人先可以感受到你有「heart」。如果你為咗「like」、錢、合作商戶，或者靠攏一啲名人而去畫圖，最終一定會變質。
貓叔：當然啦，老實講「like」嘅數目會關乎我哋嘅收入，話完全冇唔開心係假嘅～傻嘅咩～但如果我只顧住諗呢啲數字，啲作品只會越畫越勢利，冇咗我哋想要嘅嘢。無論如何，都唔可以忘記自己嘅初衷──到底係為咗錢，定係為咗自己想做嘅嘢呢？
啲fans少咗，咪當返去初初起步嗰陣囉，有客想傾生意咪減價囉～唔係點啫！錢真係魔鬼嚟，會令一切變質，而我覺得只要生活到就夠。
畫圖最開心事：hea hea地又可以生活到
小編：可唔可以俾啲意見俾有心加入插畫界嘅新人？
貓叔：其實我覺得插畫家呢行好易入，但太多人唔夠恆心，捱唔住。聽過有新人話佢畫咗一個月，畫咗十幅畫，但都冇人睇，所以放棄喎。
爵爵：十幅畫，我哋三日都畫完兼post埋添啦！應該俾多啲耐性同恆心囉。
貓叔：另外，亦要發掘自己與別不同之處。你啲作品有咩咁獨到，要人哋睇呢？好多人都做緊啲自以為好特別，其實係好普通嘅嘢，結果冇人欣賞，鬱鬱不得志，但又唔肯做啲嘢去改變，咁就好容易放棄。
其實，好多人都有理想、有潛質，亦有idea，只係表達得唔好，而呢樣嘢其實可以訓練到，慢慢進步。我哋第一幅圖，都同宜家好唔同啦，唔好期待一下子就可以好完美。
另一個tricky位係，可以畫一啲受眾鍾意嘅嘢先，到儲到咁上下觀眾，先轉返自己風格。如果一開始做嘅嘢太冷門，受眾唔接受，咁就連基本嘅成功感都冇，好容易感到挫敗。
小編：老實講，現實中未必每個人都可以成功，你又有啲咩建議俾佢哋呢？
貓叔：其實失敗唔緊要，但要知道自己點解失敗，唔好浪費呢次失敗嘅機會，因為已經損耗咗時間同金錢，如果唔攞返啲嘢會好蝕底。之後，要睇吓點樣改善，睇吓人哋點樣成功。但係千祈唔好走去睇嗰啲咩「李嘉誠如何成功」，嗰啲係假嘅，要睇啲貼地嘅成功例子，睇身邊嘅人嘅例子。
爵爵：就算未必做到出名，但個過程開心，都值得架！
貓叔：如果你問返自己，係真心鍾意做嘅，想再進一步，就檢討吓自己行緊嘅模式，諗吓點樣毋忘自己初衷之餘，亦可以繼續進步。
小編：最後，你哋點樣定義「成功」？你哋覺得自己算唔算成功呢？
貓叔：成功係冇得定義㗎喎！搵到一億定十億先算成功？到你搵到十億，唔通又覺得要搵到一百億？
我覺得自己開心咪係成功囉。宜家我可以hea hea地咁生活到，自己又開心，大家又鍾意，我覺得每日都成功一次㗎啦！^0^
爵爵：畫畫係一件令我好開心嘅事，又可以同大家分享笑料，又可以搵到食，令我好有成就感，好幸福。我未可以話自己成功，但係自我感覺良好啦！^_^
（全文完）
同場加映：Project Lucida - 香港城市大學講座：爵爵＆貓叔創作講不停
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
