【疫情減褪】8大現金出糧假日短工 或助紓緩打工仔經濟壓力

【疫情減褪】8大現金出糧假日短工 或助紓緩打工仔經濟壓力
Jobsdb content teamupdated on 13 March, 2020
Share

香港人,買貴樓、捱貴租、物價高、消費貴⋯⋯好彩買咗樓,供樓唔斷得,而家時勢差,又驚變負資產;唔好彩未買樓,上一秒偷笑,下一秒又驚無咗份工。錢、錢、錢,講到尾都係錢作怪!打一份工出一份糧,要養一家人,真係未必夠,即使夠使,都儲唔到咩錢。小編精選以下呢8大假日短工,絕大多數係即日現金出糧,快靚正,可以幫補吓家計。本港連續多日未有新增新冠肺炎個案,對謀求兼職的打工仔來說是一件好事,待疫情消褪,工作機會應該會增加。

1.私補老師

相信唔少人都做過補習老師,皆因時薪高,又以現金出糧。家長們都望子成龍,社會競爭激烈,補習老師需求極大。做補習老師門檻低,只要成績好、有豐富知識,基本上就OK,有大學學歷、經驗者更佳。一般小學生補習由$80時薪起,中學生由$120時薪起,而有一些成年人想學習商業英語,都會畀到$200 一小時。不過最重要,須對教育抱有熱誠,同時要有無比的耐性,將實用的知識教給學生。即使最近疫情緊張,也影響不大,可以視像教學嘛!

2.酒店執房員

常常聽到有人到酒店炒散,全因為人工高,即日出糧,所以吸引好多人做。為了提高彈性及節省成本,酒店經常請炒散應付人手不足的問題,特別星期六、日是酒店高峰期。薪金以房間數量為單位,一間房$50 ,一般做18至20間房,即約$900至$1,000 日薪。執房員入職門檻唔算高,只要有經驗,以及足夠體力,經人介紹便可以做炒散。

▪ 10大興趣變兼職 打工仔增加額外收入大法

▪ 最新兼職炒散短期工click入嚟搜尋﹗

3.超市食品推廣員

好多食品公司都會在星期六、日或假日時請食品推廣員,在超市提供試食體驗來吸客。相信大家行超市時,都會見唔少推廣員,有的賣水餃,有的賣養生湯包,有的賣茶葉,小編留意到大多是40至60歲的女性。這工作辛苦的地方是要企足一整日,但時薪還是不錯的,有$50至$70不等,更有額外佣金,多賣多賺,有時更可以以員工優惠價購入食品,慳咗少少買餸錢,幾唔錯㗎!入職門檻低,肯學肯做,準時有責任心便可。

4.扎鐵工人

想搵快錢?扎鐵可能係一個好選擇!扎鐵工初入行日薪為$1,000,如有3至5年經驗者,即註冊熟練技工(大工),日薪可高達$2,700或以上。好心動?可是,扎鐵並非個個人都做到。大熱天時,在高溫下體力勞動;又或者在寒風凜冽下戶外工作,凍到頭皮發麻,齋聽都覺得好辛苦,所以他們賺的都是血汗錢,必須要強健的體魄、刻苦耐勞的精神,才可勝任扎鐵這份工作。

5.婚禮化妝師

要做婚禮化妝師一點都不簡單,首先要修讀專業的化妝課程,然後要儲經驗及portfolio,經驗較淺全日收費約$4,000至$10,000;經驗較多、較受歡迎可高達$12,000一日。如果客人要求幫親友、姊妹化妝set 頭,每位則約$350 至 $800 不等,視乎客人要求。婚禮化妝師有分工作旺、淡季,雙春兼潤月那年做到手軟。一般婚宴都是在星期六、日,由凌晨4、5點做到晚上11、12點,當天要全程跟足。前期工作要做足,要約客人試妝set頭、選擇適合的護膚及化妝品,為她的big day 做好準備。

▪ 戲院兼職助學生適應職場 賣飛崗位最筍,做帶位員最頭痕:「遲到者橫衝直撞。」

▪ 不簽約也有效?兼職、炒散及臨時工符合418條件 可享有的僱員權益

6.婚禮攝影師

攝影師必須擁有專業的器材,有良好的攝影觸覺,配合個人風格,將新人最美一刻呈現出來。攝影師還需要教新人如何擺pose,引babies 望鏡頭等,所以臨場發揮、即時應對是好重要的!若新人以lunch buffet 或cocktail 形式結婚,半日日薪約$4,000至 $9,000 ;若是全日時段,即由接新娘至晚宴結束,日薪約$6,000 至$8,000不等。攝影師也會有add-on 服務,包括執相、製作電子相簿、即場印相片給親友,費用約$800至$3,000 ,這些服務又可增加攝影師的人工。

7.展覽會助理(Event Helper

香港為國際金融中心,每月都有大大小小的展覽,例如婚紗展、美食節、冬日節等等,這些大展覽一般都在星期六、日舉行,方便客人。展覽會助理主要分兩大類,一種是協助形式;另一種是銷售形式。前者時薪可能稍微較高,因為沒有佣金制,約$65至$80不等,主要工作為簡單回答客戶問題、派發小冊子、理貨等;後者時薪約$50至$70,可觀的佣金有很大吸引力,多勞多得。如果口才好、用心待客,日薪可達$1,000以上。唔少展覽都向世界出發,好國際化,所以賺錢之餘,又可以開開眼界,幾正㗎!如果老闆好人,分分鐘有免費產品試用呢!

8.酒店/酒樓/婚宴場地餐飲員

婚宴有分peak season,旺季特別是雙春兼潤月的一年呢,主要在星期六、日工作。所以婚宴餐飲都喜歡請炒散,以便控制成本及人手。大家去過婚宴都大概知道餐飲員的工作,包括斟飲品、端餸及分菜、收碟等手板眼見工夫。有經驗者好易入職,如無經驗者,有關單位都會提供1至2小時的訓練班,例如教你如何分菜,所以不用擔心。時薪約$60至$80不等,有時還會有額外bonus,以及收到客人的大利是呢!

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Career development

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.