辦公室小薯：必需小心防範的五類人

每星期返5日工，每日返10個鐘，對住同事嘅時間絕對多過屋企人同朋友。同事好，當然要燒香還神，工作順利生活快樂。但同事衰呢？就無計啦，作為職場世界嘅小薯，同事又唔到你揀，唯有一字秘訣：避！小編精選5類人：「唔熟扮熟」假知己、「咩都識」自我吹捧怪、「愛佔小便宜」者、「八掛」是非精，同埋「唔關我事㗎」先生／小姐，認住呢5大特徵，當你去到新公司，最好避之則吉，小心為上！

1. 「唔熟扮熟」假知己

（《北京愛情故事》／新麗傳媒）

入職到新公司，有種人明明同你傾計次數唔超過3次，但佢竟然爆晒自己嘅秘密畀你聽，當你係閨蜜／兄弟咁。咩感情煩惱、咩身世秘密、咩被杯葛往事……總之都係負面野，悲劇女主角式嘅抱怨和苦衷。嗱！認真就輸了，你以為佢係知己，慢慢就會發現，自己不是唯一，原來公司所有人都聽過類似嘅深情故事。識得嗰兩日就交心，諗深啲就知唔對路啦！

危機：我心照明月，明月照溝渠，你當佢朋友，小心佢隨時當你Nobody；最怕佢用苦肉計套你料，轉頭竟然周街唱，咁就大鑊鳥。

2. 「咩都識」自我吹捧怪

（Iron Man／Marvel）

公司裡面有種人，佢會表現到自己「咩都識」，上知天文，下知地理，設計、營銷、推廣、文案……樣樣都懂，仲勁過Iron Man；又會吹噓自己的業績優異，叫你有問題隨時請教佢。係真定假呢，遇到問題就知啦！話說當你問佢公事嘅具體詳情、做法，佢就會「依依哦哦」，無個答案。

危機：呢類人唔識野又扮識，誇大其詞，你信佢一成，雙目失明，做錯嘢都係自己受罪呢！ 

3. 「愛佔小便宜」者

成班同事去食飯，如果有個人一到埋單就無影，又唔主動講夾返飯錢，拍拍籮柚返埋位；一次係咁，兩次係咁，三次都係咁，就非常可疑啦！你絕對可以懷疑「被人搵咗著數」。除左飯錢，同事夾錢送禮，買零食等，佢都會用拖字訣，賴帳到底。你催佢還錢，例牌答你：「唉喲，銀包無錢，下次俾你！」

危機：打工仔搵錢艱難，積少成多，長此下去被人搵笨，錢愈滾愈大，荷包大縮水。 

4. 「八掛」是非精

每個Office幾乎都會有「是非精」，佢哋是非當人情，今日唱A君擦鞋，聽日唱B君戀情，後日唱C君人工……小編舊公司有個是非精，仲化身過第一女主角，大唱T君點樣無恥地溝佢，搞到成班女同事私底下當正T君係淫蟲。想當初，T君同佢都係老友鬼鬼。

危機：呢類人一定要避之則吉，同佢講多兩句，都有可能會成為下集是非主角。

5. 「唔關我事㗎」先生／小姐

（職場卸膊操／W創作社）

最後一類人難啲辨認，佢哋個口頭禪就係：「唔關我事㗎」，做嘢最叻就係卸膊，犯錯嘅永遠係人哋。有時啲工作明明係佢哋職責範圍，出現咗嚴重錯誤，佢哋都有無數理由將個波推落第二個人身上。總之就藉口多多，抱怨不停！

危機：同呢類人合作，預左有問題就一定係自己孭晒，錯嘅只會係你。

以後如果見到公司有呢5類人，記得時刻保持安全距離，以免發生意外！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。