辦公室日報：你做緊呢份工，無論好做定唔好做，之前都一定有人做過……

新年過咗，雙糧又拎咗，開始睇緊有咩好工未呀？

喺headhunt呢一行，農曆新年之後直至六月都係轉工旺季，點解可以延伸咁耐？因為有啲公司唔止得double pay，仲有bonus，有人係連埋雙糧一齊發放，亦有人係要等到四至六月先出花紅，呢段「職場執位期」絕對有時間畀各位做足準備，睇定有咩空缺，留意下個market就啱㗎喇。

▪ 下載ios版本Jobsdb手機app 或 下載Android版Jobsdb手機app

▪ 辭職後資方留手尾：拖佣、欠Claim錢、未清假……打工仔如何依法了斷？

好多人又會擔心成為「試伏專員」，唔覺意轉咗一份伏工，由一個地獄跳去另一個地獄。個人覺得唔驚得咁多，好多嘢唔試過又唔會知，而且同一間公司、同一個職位，每個人入去做嘅體驗都可以唔一樣。舉個例子，一直以嚟我都覺得所有call center工作好難做，唔拎得部電話出嚟，又要畀Supervisor mon call，聽過有啲誇張到連去洗手間都要舉手同排隊，全日工作受監控，但後來我同一位做咗5年call center嘅求職者傾計，發覺事實並唔係咁。

呢位求職者話，佢條team冇規定要收埋電話，但工作環境始終涉及唔少客戶私隱，所以同事自律，「掃把」亦會識做，成班人已經合作多年，最短資歷嗰個都做咗3年，團隊氣氛好好，真係好似一家人。不過佢都好誠實咁表示，唔係每條team都咁和諧，所以成日聽到人哋話邊間公司唔好，邊一類工作難做，未必反映晒事實嘅全部，每個部門同埋每個主管都有唔同風格。

我自己間公司都係一樣，A Team個個月有散水餅食，因為個阿姐衰到冇人有，會大大聲鬧同事，要佢哋當眾出醜，反而B Team就笑聲笑聲滿載溫馨，如果有同事冇數，個team head只會鼓勵佢，再派啲容易嘅job畀佢搵人，唔係想特別優待，只係希望個同事盡快重拾信心。坊間都有人話我公司唔好做，跑數壓力好大，如果想投身headhunt千祈唔好入我呢間，其實睇你入咗邊條team啦！莫講話一間公司咁多人，有時一堆朋友裡面都有好人同壞人，若然因為其中一個唔nice，就斷定成班都係壞蛋，又真係有啲唔公平，亦都唔夠客觀。

每個人嘅抗壓能力、對待工作嘅態度、事業上嘅終極目標，甚至係對金錢嘅睇法亦好唔同，我身邊嘅朋友就非常兩極化。有個女仔為咗高薪厚職可以做份一個打十個嘅工作，佢話會限住自己一日去三次廁所，我對此表示驚訝，但絕對唔會否定佢，畢竟佢供緊層樓，父母同細佬都冇返工，佢呢份工作辛苦嘛？一定辛苦啦！但藉住呢份工得到需要嘅嘢，同時累積緊經驗，等緊一個機會跳槽，呢樣嘢就係佢嘅部署，好多人只係睇到表面，話佢奴性好重，但背後嘅諗法只有佢自己知道。


另一位男仔朋友捨棄咗份24,000蚊月薪嘅sales工，因為覺得好大壓力，繼而搵咗份15,000普通文職，賺少咗9,000，但我見佢開心過之前，起碼有返自己生活，日日做gym之餘，已經計劃緊年中同女友拉埋天窗。有人10萬蚊一個月都唔夠用，有人1萬一個月依然樂在其中，分別就係價值觀同埋追求嘅目標，而嗰份24,000蚊嘅sales工亦好快有其他人做緊，聽講仲做得好開心，家家有求，其實冇分對與錯。

老生常談嘅一段說話：「你做緊呢份工，無論係好做定唔好做，之前都一定有人做過，即使你唔做，之後亦會有其他人願意做。」所以好與壞唔使畀外人影響，要自己體會，每份工作都一定會令你學到新嘢，好嘅照單全收，壞嘅當攞個經驗，將來避免重複犯錯。

▪ 聶瞳：辭職後獲公司挽留，不代表你無法取替

▪ 用Jobsdb手機app搵工，AI幫你篩好至啱筍工

我哋唔需要搵一份十全十美嘅工作，因為根本就冇，我哋只需要搵一份最適合自己嘅工作，有啲工唔啱我，不過啱你，有啲工唔啱你，但又好啱佢，所以職場每日先有咁多離離合合。你份工適合你嗎？唔適合？仲搵緊？其實唔緊要，最重要係我哋從來唔缺少重新上路嘅勇氣。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。