唔知你哋有冇試過喺office叫嗰啲老火湯外賣,即係人哋會連個壺一齊送嚟,然後第二日收返個壺嗰種。
咁我有個friend因為某一次好想飲老火湯,又出於好意之下問埋其他同事要唔要啦,跟住......以後每逢叫老火湯就個個都點佢落單喇,久而久之連嗌其他外賣都係佢負責。
其實呢啲係好小事,我個friend亦都冇乜所謂既,不過逐漸地演變成老奉,因為老火湯外賣如果要lunch time準時送嚟,咁就要10:30am前打去落單,有幾次佢已經喺WhatsApp group吹晒雞問有冇人要?梗係有個別同事已讀不回,咁冇回覆可能係人哋今日唔想飲老火湯呢,佢公司都成50幾人㗎,好難逐個位行去問,點知去到12點半左右,又一定會有同事埋怨:「點解唔直接行嚟問呀?唉,睇漏咗冇得食啦!你可唔可以打去問加多個得唔得?」
▪ 售前工程師 要識sell又要識IT 年薪高達百二萬 唔使考牌但入行超難
▪ 隱形茶水姐姐頻頻抹跡不辛苦:「最難受是有人昂高頭不理你。」
仲有回收湯壺,佢又變咗應份一個人collect晒,都算喇,有次個同事冇自動自覺拎出嚟,第日人哋嚟收壺嗰陣少咗個,佢要問完又問先搵個係邊位同事唔記得交還,仲要畀嗰位同事怪責:「你今朝唔過嚟remind我?」
當然啦!仲有好多同事係唔記得畀返外賣錢佢,永遠都係收唔足。
佢平日仲幫唔少同事執手尾,做一次好心,以後嗰樣嘢就變咗自己嘅job duty。講過佢好多次㗎喇,唔好將一切變成老奉,應幫就幫,凡事都要有底線,結果佢答:「咁個同事請假吖嘛,sales走嚟我個department問,負責嘅人又唔喺度,我咪幫手跟埋囉,好難唔理嘅,但係之後有咩事就個個都搵我,老細又話反正已經跟開,叫我跟埋落去。」
咁係咪個別同事特別衰呢?經我同佢多次傾談之後,又唔止㗎喎!有另外一個新仔返工,照道理佢可以lead住人吖,點知過咗一頭半個月,連個新仔都可以蝦佢。
你愈弱,就會遇到愈多壞人。
新仔見我朋友平時唔識得say no,好快就有樣學樣,因為有辦你睇吖嘛,原來漏低蘇州屎都會有人執,跟緊project突然請假又會有人幫手follow,嗌外賣可以點人,食完最好有人嚟收走湯壺,外賣錢就記得先畀啦!當一個人好弱,自然會吸引到啲壞人從四方八面湧埋嚟蝦你,呢個唔止係公司縮影,亦都係一種社會現象。
我以前做sales都試過,有個客遲咗落單,但係批貨趕住要,否則就要走飛機,個cost比起走船貴咗好多好多,老細一定鬧爆佢,好啦!跟住我就開個方便門畀人,先抽起另一個客冇咁急嘅貨,再打上廠請工人幫手趕埋淨低嘅數量,咁呢個客的確有多謝我嘅,不過自此之後,佢就次次都要打尖,張單最後一刻先落,但就要第一個收貨,不斷搬我較早前幫佢嘅例子出嚟:「你上次都得啦!點解今次唔得呀?」原來我開方便門畀人,到頭來係我最唔方便。
▪ 【職場癌細胞】看old seafood如何點金成石,將人才變庸才
第二次同第三次都拒絕咗之後,佢竟然向我department head投訴,又威脅唔再畀生意我哋做。
後來睇清楚,呢個客慣性每次都搵唔同著數,例如想要特快貨期,但又要求特長數期,然後彈我哋啲貨呢樣嗰樣,又話貴又話盛,而你最不解嘅係,咁多嘢不滿,佢又繼續同我哋公司落單㗎喎!點解呢?因為嗰隻型號嘅產品,行內以我公司最平,就算係正常嚟計,出貨亦都快過其他行家,不過好多人都有個特點,就係鍾意埋怨同欺負一直幫你嘅人,可能真係好蝦啲啦!
如果要舉個例,就好似早前有店舖熱心撲口罩返嚟幫市民,最後派完籌售罄,反被人包圍同埋辱罵,啲人唔會諗邊個造成口罩荒,但就會怪罪出一分綿力幫手嘅好心人。
我哋冇辦法改變身邊嘅人,但起碼要令自己慢慢變強,太soft會畀人食住上,可惜性格使然,做得太strong同埋無情,自己個心又會唔舒服,唯有每次撞板都汲取教訓,好好拿捏平衡點,因為你愈弱,就會遇到愈多壞人。
辦公室日報
曾任記者,現職獵頭,2018年推出第一本書,同FB專頁一樣叫做【辦公室日報】。每日見盡職場上嘅離離合合,就正如經典名句「城外的人想衝進去,城裡的人想逃出來」,既寓婚姻,亦可投放喺每間公司,因為搵工同搵另一半都係勉強冇幸福。
|
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。