辭職的迷思：年假可以代替通知期嗎？

唔少打工仔本住「魚唔過塘唔肥」嘅金科玉律，都會選擇等公司一出完Bonus就準備華麗轉身。喺呢啲求職者當中，未必個個都有膽識同能力裸辭，另外亦因為對家庭有愛同責任，大部分都希望可以工接工，做到經濟無縫式交接。

之但係，由揀工到Send CV，之後再過五關、斬六將，成功通過Interview搵到份好工之後，新僱主通常都會要求你盡早返工。須知大部份公司都需要一個月正式通知期先可以離職，為咗唔好得失新僱主，好多人都希望盡量配合，於是就想利用之前儲落嘅年假嚟畀自己早啲走。但事實上，年假可唔可以代替通知期呢？

法例冇話唔得，最緊要老細批准

首先，我哋喺僱傭條例角度出發。終止合約時，雙方都需要給予對方適當嘅通知期（Notice period），而如果比原定通知期早走，就稱之為Short notice。

通知期係可以用代通知金（Payment in lieu of notice）代替，所以其實無論你有冇剩餘年假，只要你肯支付適當代通知金，都可以提早離職。而從僱主角度睇，因為尚未放嘅年假*，都需要支付年假薪酬，所以只要交接妥當，用年假去Offset通知期，係可以大家商討嘅選項。

（*只限在個別假期年內受僱滿 3 個月後而未放取的年假）

另一個狀況係，辭職後身份變得尷尬，遇到上火嘅上司可能仲會畀面色處處留難，於是有啲打工仔會希望縮短上班時間，喺通知期內請年假，等大家唔使面阻阻。其實僱傭條例冇規定辭職後不能放年假，但係年假都係要僱主批准的，所以只要僱主同意就可以喇。

老細通常都想你幫到最後

不過，對於某啲日常運作比較繁重嘅職位，僱主自然會希望同事可以留低幫到最後一秒。講到最後，轉工唔係一場戰役，大家留一線，日後好相見，最重要係雙方協商Win win，因為你永遠都唔知道將來喺工作上會唔會遇見前僱主，又或者要尋求前僱主幫手完成自己嘅Reference check。

本文由人力資源顧問公司Six People Map提供

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。