十個難識另一半的職業
認識一位男性朋友A，當時30歲，身高1.8m，青靚白淨，月入三萬，為人正直、大方、有義氣，從未聽過佢講粗口，係眾多朋友眼中嘅超級筍盤，但離奇嘅係……佢竟然冇拍過拖。綜合各方意見，大家都認為原因只有一個──佢從事IT十年，仲要係大公司，成層都係佬，加上工作忙，有時連週末都要做嘢，所以好難識女仔。
好多時見身邊嘅朋友，其實條件都非常好，不過做嗰行真係難啲識人。有邊啲職業有咁嘅情況呢？
難識男朋友的職業
1. 教師
老師工作忙到甩碌，返到屋企仲要改簿、備課，放假都要迫住進修、搞科外活動，想擠少少時間去玩都難。至於學校嘅阿sir，一係就結哂婚，一係就已經四、五十歲，如果係幼稚園老師仲要清一色係女添。不過如果出去識人，其實有好多男仔鍾意，因為覺得有愛心又有耐性嘛！
▪ 在港教師與打工仔無異：校長就係Boss，應付無理要求、工時長壓力爆煲
(Image by US Department of Education via flickr)
2. 護士
護士工時長壓力大，一星期放得一日假，仲要唔一定放到周末，點約人去玩？而且每日都要做粗重工夫，返屋企都瞓吓覺好過。身邊唔少已婚嘅護士朋友，都係讀書時mark定對象，畢業後快快手結埋婚。不過掛住「白衣天使」嘅光環，人工又高，其實都係不少男士嘅理想老婆。
3. 美容
做得美容師，個樣一定見得人同有咁上下溝通技巧，但可惜返工同事全部係女人，啲客又全部係女人，就算好彩喺出面識到男仔，返工嗰陣都冇得玩手機傳情，比上頭發現隨時扣人工。
4. 會計師
入得大行，尤其是Big 4做會計師，旺季期間例必日以繼夜、夜以繼日工作，僅餘嘅私人時間又要忙住考牌、進修，除咗同期一齊入行嘅男同事之外，都較少機會識到男仔。到一切穩定嘅時候已經30歲，喺市場上又要面對一班十幾廿歲、青春無敵嘅對手了。
5. 保險／金融業高層
如果有心喺金融業發展，最好早啲搵定另一半了，因為呢行陰盛陽衰問題嚴重，加上當自己變成三高熟女（高學歷、高收入、高職位），自然都會變得心頭高、要求高。到時仲能否搵到一個「講心唔講金」嘅真愛對象？冇話唔得嘅，難少少囉。
難識女朋友的職業
1. IT
首先，做IT日日唔係對電腦就喺對機，人影都唔見多隻；其次，大家返工時佢哋要做support，到人哋收工、放假時佢哋又要留低整server，連休息時間都冇，更枉論周圍去識女仔。所以， IT男集穩重、沉實、捱得、專注、唔去玩嘅優點於一身，其實絕對係好老公嘅對象。
2. 工程
讀大學上lecture時男女比例已經係300:1，返工唔係仔就係佬，連地盤啲阿姐都結埋婚。要識女仔，最好讀書時識定啲讀護士嘅朋友，再借佢個network識人。
(Image by DLR via Wikipedia Commons)
3. 保安
做12碼保安，毋須經驗，月入即可過萬，拉閘就可以收工，好過坐office搵11k仲要免費無限OT，已被喻為新一代年青人筍工。不過針無兩頭利，做得呢行，返工都唔預咗會見人（見到仲驚），而且好少聽啲港女話「理想男友職業」會係保安。
▪ 【另類筍工】公司主管被退休轉行做保安員，竟獲聘坐在大館當演員
4. 會計師
同女會計師一樣，一星期七日忙到不成人形，邊有時間出去玩？不過比女會計師好彩嘅係，會計界女多男少，而且男人唔會有年齡嘅憂慮，反而上咗位之後可能仲多異性主動埋身。
5. 做lab
做lab又係一份辛苦工，晚晚OT到深宵係正常，忙起上嚟連周末都要做，而且工作環境最多都係sample／老鼠或者男同事，想識個女仔都難啦。
當然，希望在明天吖嘛，凡事唔係絕對嘅。朋友A嘅老死後來介紹咗個政府工女仔俾佢識，由於兩個人條件都好好，就順理成章一拍即合，年半後仲拉埋天窗，幸福美滿添。其實唔理咩職業，性格好最重要，只要踏出一步積極啲認識朋友，隨時變為搶手貨！
延伸閱讀：
一小時生活圈不是夢！香港最方便返工放工地點除了中環，還有它們……
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
