2016年你一定要有嘅事業目標

be more awesome than last year

踏入2016年,唔知你定立咗新一年目標未呢?唔好再等喇,jobsDB準備咗八個目標俾大家揀 (喂,係呀,年年都係呢啲,咁你做咗未先?),祝願各位打工仔新年勝舊年!

1. 返工不再夢遊

有冇計過你上年每日返工有幾多時間係hea咗去?咪再雲遊,做嘢精神啲、爽手啲,OT都少啲;當返工好似返學咁,每日踏出公司門口之前都要學到新嘢。


2. 讀返個degree/master

半工讀嘅辛苦之處真係不足為外人道,但不少過來人都話,捱過後竟然會回味辛苦嘅過程,而且能換來一份更好嘅工作同薪水。人生苦短,為一件事努力過嘅感覺其實都唔錯!


3. 更有責任感

唔理你係一個GM定茶水阿姐,都應該對自己嘅責任上心。你會唔會因為唔想起身而射波?遙距工作嘅時候會唔會蛇咗去上Facebook?一個人係咪有誠信,你老細係看在眼裡㗎。


4. 隨心而行,緊守原則

雖然人在江湖,多多少少需妥協,但界線宗旨要分明,唔好做違背良心嘅事。人在做,天在看,出事俾人起底仲慘豬。


5. 每星期做三日運動

係人都知做運動有益身心,防止肥肉隨歲月增長,但永遠個個都唔起心肝去做。其實每星期三次,每次30分鐘帶氧運動,係咪真係好難?


6. 少啲OT,陪多啲屋企人

為事業搏殺緊嘅你,嘗試喺工作同生活中搵個平衡點,珍惜眼前人,記住錢係搵唔哂㗎。


7. 升職加薪

香港地主動要求升職加薪唔係易事,但並非冇可能。打工仔不妨分析一下自己現時嘅位置是否重要,為公司做咗幾多業績,再了解吓市場價位,如果有把握就可以去馬。祝君成功!


8. 搵份更好嘅工

你公司總會有幾個年年都話走,但走極都未走嘅人。正所謂「魚唔過塘唔肥」,如果你覺得宜家嘅位置冇乜發展空間,就要放膽行出comfort zone,接受新挑戰。

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案