5句打工仔最想老細講的說話

自古以嚟,「打工仔」同「老細」都係處於對立嘅位置。有啲無良老細本住「我係老細,所以我大晒」嘅心態,用難聽、侮辱性甚至問候式嘅說話,暗示或明示打工仔嘅地位比佢低,做嘢能力比佢差,從而打擊對方嘅自信,要對方100%服從。打工仔心諗:「其實大家都有阿爸阿媽生,可唔可以當返我係一個人,而唔係你嘅出氣袋?」

所以好多時,打工仔如果有幸喺一間尊重自己嘅公司度做,真係會肯心甘命抵咁同你OT,甚至喺有困難嘅時候同公司共度時艱。有啲說話,打工仔真係好想從老細口中聽到!


1. 「我錯了」

聖人都有錯,有時老細畀錯指示,或者作咗個錯嘅決定,真係一啲都唔出奇,而作為下屬幫老細善後亦係份內事;不過可以簡單講返句「唔好意思,搞錯咗」,顯示返應有嘅氣度同埋責任感,而唔係死兜爛兜扮冇事發生,或者篤條「o靚」出嚟做箭靶。

5句打工仔最想老細講的說話


2. 「辛苦晒」

其實打工仔OT,唔係因為OT好開心,而係佢哋想盡好自己嘅責任,知道件project交到落自己手上就要做好佢,而非搭正六點就一走了之。不過總有啲老細唔識趣,講埋啲風涼說話好似:「Work smart, not hard」、「你OT代表你工作效率低」、「你咁勤力真係抵請,呵呵呵」,完全唔體恤下屬嘅辛苦同付出。

5句打工仔最想老細講的說話


3. 「你點睇」

Micromanaging(微管理)係現代職場嘅大忌,作為一個接受過教育、有返咁上下社會經驗嘅成年人,點會鍾意做每一件事都俾人管住同挑剔。相反,老細放手畀下屬去提出意見、作決定,係可以令打工仔對工作更有士氣同投入感,激發佢哋嘅潛能。(不過,有啲老細假民主,聽完意見後態度照舊,甚至棒打出頭鳥,又係另一個問題)

5句打工仔最想老細講的說話


4. 「你A、B、C做得唔錯,而D、E、F可以再做好啲」

打工仔畀心機做完一份project之後,當然希望老細會賞識自己做得好嘅地方;同時,其實打工仔都好希望老細見到自己有咩不足之處,可以指出同埋教導點樣做好啲,等自己有所得著同進步。至於好似「乜你做啲嘢咁垃圾」、「搵個識呼吸嘅人都可以取代你」、「周街都係人點解你開唔到單」呢啲無腦嘅發洩說話,多講無益啦。

5句打工仔最想老細講的說話


5. 「我決定升你」

其實畢業後選擇做寫字樓工,原因不外乎係希望份工有「成長」──即係可以累積經驗,職位同人工都可以隨住年日拾級而上;所以為公司仆心仆命咗咁耐,老細一句「冇得升」簡直比話你廢更難聽。如果唔介意升唔升職,我點解唔走去做12碼保安,返工時間可以睇書、玩電話,拉閘就可以收工,月入仲可以15k?做乜仲要喺office搵11k仲要晚晚免費無限OT?

5句打工仔最想老細講的說話


其實遇上一個好老細真係好難得,唔怪得好多人會覺得公司文化仲緊要過人工高啦!

 

(圖片來源:WhatsCap

 

延伸閱讀:

[不要再說了]5個打工仔「摟打」詞語

搵工迷思:這間公司的文化適合自己嗎?

[點止做苦力]5個機械人正在做埋你嗰份的工種

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案