WFH放負有理！在家工作見真章 最怕遇著5種惡頂管理層
一日返工9個鐘，計埋OT，對住同事嘅時間分分鐘多過屋企人，所以工作環境、同事關係等，直接影響我哋嘅身心理健康！難過嘅係，一間公司總會養咗奇形怪狀嘅管理層，跟著個傻嘅、癲嘅、chur嘅阿哥/阿姐……嚟到疫情下嘅WFH，唔好以為佢哋遙距咗，大家就變得相處容易，事實係更加恐怖！
1. 24小時時間管理者
小薯們可能心諗，個個返工唔通個個都想返工咩……唔係囉，真係有人好鍾意返工，遇著阿頭係chur爆型，想放工都難！聽朋友R講過，佢阿姐絕對係工作狂熱者，正常返工時間9點，阿姐會8:30就返到，正常放工時間6點，阿姐會8點甚至更夜走，其實佢係咪喺公司紮營？R試過遇著8號風球，阿姐未落波就返工，一落波就WhatsApp叫大家報行蹤，返工機器咩，都係打份工啫，唔使咁搏嘛？
另外，呢類型工作狂阿頭，人生除咗工作，就係工作，亦唔明白點解下屬放工後有咁多節目。最常遇到嘅情況係，臨收工前一至兩個鐘阿頭就會派job，完全無視下屬收工時間，expect要OT完成。而喺在家工作嘅日子裏面，佢甚至會預咗同事深宵都同佢有公事交流。因為冇咗實體辦公室，佢連時間觀念都正式撤銷埋，最慘係到星期六日，甚至連你拎AL，都唔放過！只要一諗起同你相關嘅公事，就會打電話及WhatsApp你，仲要加句「Tried to call you but in vain」。大佬，家陣出幾錢糧呀，要on call 36小時…….施主，收手啦好嗎？Get a life啦！
2. Control freak唔管唔安落
有啲人，一旦擁有權力就好恐怖，覺得自己係管理層，就要管理下屬大事小事！朋友T遇過一位控制狂阿頭，咩都管，除咗要密密update工作進度外，又會micromanagement。 T試過出咗一封email，一秒即刻收到電話：「喂，你點解寫Best Regards，同對家好熟咩？下次你就咁寫Regards啦！」
被人監視每一個動作真心心寒，T有次去廁所，無熄mon，行返埋位，就見阿頭企喺佢個位。望望望，望下個mon開緊咩、望下枱頭有咩文件。最近home office，阿頭講明要用skype實時溝通，只要一唔顯示online，佢就即刻問去咗邊，最後T連飲杯水、去廁所、食塊餅，都要事先報告…….阿頭嘅控制程度已達變態級別。其實吊頸都要抖下氣啦，俾多啲信任下屬係咪咁難？
▪ Work from Home係轉工、搵工好時機！在家工作有咩求職優勢？
▪ WFH在家工作：5個實用APP推薦！提升Home Office效率、溝通及專注力
3. 經常性失憶型
呢類阿頭身懷絕技，雙重標準，寬己嚴人，無事牙擦擦，有事走咗人！之前遇過一位咁樣嘅上司，如果下屬做錯，馬上大發雷霆！到自己錯、俾錯brief，就直接把問題歸咎下屬，話下屬聽錯。
在家工作下，呢類上司失憶情況每況愈下，經常會冇講當講咗。總之 大家冇得親身接觸，佢就更飄忽，將想像咗嘅嘢移花接木到實際情況，一旦有錯，就用「我一早講咗啦」為由脫身。好嘢﹗
4. 咩都鬧侮辱型上司
總係有上司鍾意踩低下屬藉以抬高自己，朋友S係一位秘書，經常被奄尖刻薄嘅阿姐惡言相向、言語侮辱，例如經常話佢蠢：「唔好咁豬得唔得」、「唔明你點解錯」、「真係得我咁好人先收留你，其他人炒左你啦」，日日被鬧心情當然唔好，S自尊心亦受創，覺得自己好差。S嘗試努力做好工作，但換來都係一句：「終於似番個10歲嘅人做嘅嘢。」最慘係，上司填appraisal 會寫到朋友好低分，直接影響薪酬升幅……但唔好以為在家工作有得抖呀，呢類言語侮辱係不分地域限制嘅，而家仲要由辦公室延伸到WhatsApp，同私人生活混為一談，有時同朋友講緊去邊食飯，突然收到阿姐鬧人嘅message，大大影響心情。
▪ 打工仔Work from Home之N個難處：同事失蹤、老細急追、開會斷線，點算？
5. 朝令夕改型
遇到優柔寡斷嘅阿頭，都會反眼。作為阿頭，要有領導才能，最好有明確方向和指示。當阿頭心大心細，五時花六時變，朝頭早講A，突然一句：「都係唔好喇。」然後轉B，佢知唔知道要浪費幾多人力物力同資源！最慘係在家工作突然話開會，又突然話唔使開，任意cancel meeting，都幾煩人架﹗
唉，打工仔人微言輕，都係想呻下、放下負啫，無咩事都係出返去做嘢喇！
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
