50句飲食業者最憎嘅麻煩客說話,你聽過幾多句?

50句飲食業者最憎嘅麻煩客說話-你聽過幾多句

有人話,要判斷一個人嘅高低,最簡單嘅方法就係睇佢點樣對待餐廳入面嘅侍應。作為前線飲食業從業員,往往可以見盡人間百態,人情冷暖,人性醜悪……其實大家都係打份工啫,點解有啲人畀咗少少錢,就好似覺得自己係神,將自己嘅情緒發洩喺其他人身上,或者提出一啲好無厘頭嘅麻煩要求,要人哋當自己大帝咁服侍呢?

以下50句麻煩客說話,你又聽過幾多句?

  1. 我唔想同你講嘢,叫你經理出嚟!
  2. 你信唔信我寫上網度唱衰你吖嗱!?
  3. 你叫咩名呀!?我要投訴你!
  4. 服務又差,又唔好食,唔使旨意我再嚟呀!
  5. (食完每一樣餸)換隻新碟畀我哋。
  6. 同我執吓張枱。(但手上已經托住勁多碟)
  7. 可唔可以整咗我哋嗰個先啊?我哋趕住去睇戲呀!
  8. (食一碗雲吞麵)畀張泊車單我。
  9. 張coupon啱啱過期啫,extend兩日俾我都唔得?有冇搞錯啊?
  10. 魚柳包……(問佢:「唔好意思,聽唔清楚?」)都話魚柳包囉囉囉囉囉囉!!!!!!
  11. (繁忙時段)唔該寫嘢!um………………不如你介紹吓有咩好食俾我知吖。
  12. 唔該寫嘢!um……食咩好呢……要呢個啦!都係唔好!um ……要呢個啦!都係唔好,好似呢個好啲喎……um……
  13. (落單10分鐘後)um……我都係想改另一個餐!
  14. (下晝2點)有冇早餐食?
  15. 咖喱雞……走辣吖!
  16. 隻蛋要煎7成熟吖!
  17. 熱華田,同我沖濃啲喎!
  18. 啲牛咁肥㗎,同我換咗佢!
  19. 點解啲雞翼咁細隻㗎!我上次食都冇咁細隻!你同我解釋吓!(咁你有冇上次雞翼尺寸嘅record?我跟返個spec畀隻新嘅你吖)
  20. (著住背心)個冷氣好鬼凍呀!同我熄咗佢。
  21. BB不如轉去坐嗰度啦!……BB好似坐嗰度仲好喎!……好似頭先好啲,BB我哋坐返過去啦!
  22. 仲有10分鐘就開門,俾我坐住先都唔得?
  23. 仲有10分鐘先閂門,俾我叫多碟嘢都唔得?
  24. 嘖……!(音jeep,港女發出的聲音)
  25. 隔離張枱好嘈呀,你同我話吓佢哋啦!
  26. 我理得你,總之你同我搞掂佢!
  27. 少少嘢都做唔到,抵你做死一世侍應呀!
  28. (食哂之後)碟嘢好難食呀,你叫我點畀錢呀?
  29. (食哂之後)碟嘢唔夠熱呀,你打返個折畀我啦!
  30. 點解你哋個free wifi咁廢㗎!?正一廢柴!
  31. 吓,賣哂?你知唔知我專登揸車入嚟食㗎,總之我一定要食啦!
  32. 我係客人!我畀錢㗎!你要我等!?
  33. 你5分鐘內畀唔到枱我,我就投訴你!
  34. 你知唔知我係VIP嚟㗎!
  35. 你知唔知我隨時食一餐都貴過你份糧呀!
  36. 冇我哋啲客入嚟俾你serve,你哋一早執咗啦!
  37. 今日我生日喎,有冇嘢送呀?
  38. 其他餐廳都有呢啲服務㗎喎,有乜理由你哋唔畀㗎?
  39. (「要唔要加單?要唔要甜品?使唔使打包?」)……(唔應你)
  40. ……(8號風球送外賣但一蚊貼士都唔畀)
  41. 唔使找錢啦!(懶大方嘅表情但其實係畀exact change)
  42. 阿仔,叫咗你唔好揈嚟揈去,整瀉咗杯嘢而家冇得飲啦!(唔出聲自行調去另一張枱,亦冇對嚟拖地嘅阿姐講一句唔好意思)
  43. B仔唔好攞啲餐具嚟玩啦!(但對眼望住電話)哎呀,打爛咗添,唔好意思喎。
  44. 畀咗加一㗎啦,唔使同佢講唔該。
  45. 你而家咩態度呀?
  46. 你知唔知你做錯咩呀!?
  47. 我而家教精你咋!
  48. 你而家即刻道歉!
  49. 嗱,你唔讀多啲書,第時就要好似呢個哥哥/姐姐咁做侍應㗎啦。
  50. 今時今日咁嘅服務態度唔夠㗎!


打工仔遇上麻煩客真係好難頂!不過話時話,其實冇品嘅侍應都有好多,好似黑口黑面寸寸貢、未食完就收走碟嘢、扮見唔到客人、喺食物度加料咁……如果大家都可以更尊重其他人,香港就會更美好啦!

 

延伸閱讀:

[不要再說了]5個打工仔「摟打」詞語

返工枯燥到想quit?去外地做義工加添正能量

工程人最怕這樣的老細

想搵酒店及餐飲業好工?想知唔同職位可以搵幾多?即刻上「Hospitality/F&B Frontline 前線酒店及餐飲業專頁」睇睇!

 

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案