8種變態老細 梗有一個喺左近

8種變態老細 梗有一個喺左近
Jobsdb content teamupdated on 19 August, 2016
Share

有冇計過自己每日會喺個心入面鬧你老細幾多次「黐線」?自古以來,老細都係「不近人情」、「有風駛盡」嘅代名詞,我們生命中總會遇到幾個。


1. Chur爆狂

有時開完會半個鐘,老細就send email問你份proposal寫好未;或者明明你手上已經跟緊十幾個project,都要每個星期開會時諗啲新嘢出嚟搞。喺佢哋嘅眼中,無論你幾咁努力、幾做得嘢,都只係一條手腳慢又execute唔到嘢嘅懶蟲。


2. 開會狂

啲冇料扮四條嘅老細最鍾意開會,因為工作卸哂俾下屬,自己冇嘢做所以用開會嚟顯示自己好多嘢做。每朝9點要開半個鐘早會,每星期要開例會叫下屬報告status,久唔久諗起又開個會「了解」project進度同插吓大家點解做嘢咁慢,啲下屬心諗:「由朝到晚開會仲邊有時間做嘢?」而佢自己嘅工作只有簽名、睇股票同plan吓下個會幾時開。

8種變態老細


3. OT狂

有啲老細以公司為家,永遠你返嚟時佢已經坐喺度,你走時佢仲係坐喺度。最慘嘅係,佢要求你同佢一樣24小時on call,要你周末喺屋企入單,喺你去旅行時要你覆資料俾個客,將你嘅Whatsapp變成Worksapp。呢個時候,你只可以心入面咒罵「睇死你個中女嫁唔出/中坑媾唔到女要寄情工作」令自己精神上勝利返少少,一邊含淚默默照做。


4. 公器私用狂

呢種老細(尤其細公司)好鍾意叫下屬幫佢做私人嘢,好似叫IT同事周末上佢屋企整電腦,叫秘書幫佢湊仔、做功課,或者返大陸時順手帶幾罐奶粉、幾條中華咁,講句「拍硬檔啦」就合理化咗件事,想拒絶又唔得。但如果件事唔合理,例如佢要你帶報紙、書返大陸,或者做其他可能犯法嘅事,一定要堅決say no。


5. 腌尖狂

腌尖狂老細最鍾意喺你意想不到嘅地方挑你錯處,例如明明搵間cheap雞廠印四色但會話:「我唔係要呢隻色啊~~我要好似Dior嗰隻藍啊~~~(真實對白)」,或者拎把尺出嚟度:「點解呢度會歪咗0.5mm㗎!?」講完佢哋就會好有滿足感,覺得自己原來有做埋Creative Director嘅潛質。


6. 口號狂

「口號」係一種跳過邏輯思維、直接鼓動情緒、排斥逆向思考嘅手段,所以當你老細同你講要「aggressive」(人工又唔見你加)、「take challenge」(一舊垃圾點market都係垃圾)、「work smarter, not harder」(一句話抹殺哂你嘅努力)、「think out of the box」(又唔見你自己think吓),其實潛台詞只係想講:「你咁廢,今晚OT同我死掂佢。」


7. 偏心狂

呢種老細用人唯親,最鍾意喺身邊收埋啲刷鞋仔、馬屁精,由朝到晚好似錄音咁不斷播啲恭維說話。曾經見過一個肥女老細,每次巡視office時都有兩個左右護法跟實,到annual dinner時佢哋又懶親切咁撓住隻手話:「我哋影相吖~~」你笑佢哋噁心?睇吓年尾邊個派bonus派得多啲。

8種變態老細

(網絡圖片)


8. 扮friend狂

扮friend狂會主動籠絡啲下屬同自己做friend,但同偏心狂一樣,往往陪佢食飯嘅都係嗰一、兩個刷鞋仔。呢啲老細會無啦啦叫你add佢Facebook,而你當然冇得拒絕,但當你一add,首先你啲同事會從此唔敢再tag你,禁止你喺啲相度tag佢哋,同埋唔再喺你啲post度留言,以免俾老細發現佢哋都有Facebook。然後老細會睇住你喺Facebook嘅一舉一動,喺你啲post度留言、講公司嘢,亦會喺「動態消息」見到你like咗一篇叫「8種變態老細」嘅文,然後第二朝喺pantry同你講:「咦Simon,你對公司係咪有少少意見?」……

 

延伸閱讀:

一幅圖幫你決定辭唔辭職好

面試時遭未來僱主壓價該怎麼辦?

「姐」就是變通!4位空姐轉型做私補、創網店、移民推廣

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Career development

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.