80後社工半途出家開麵店：用時間換取自由

「我受夠豬上司啦，我要創業搞小生意做老闆！」相信唔少打工仔都聽過朋友頂唔順份工，走咗去開網店、Party room、新娘化妝、代購等等，踏出Comfort zone走上創業之路。其實做老闆係咪真係想像中咁自由、咁爽？小編今次就專訪由社工搖身一變成為麵店老闆嘅Hana，大家一齊聽聽佢嘅創業故事啦！

老闆即是打雜，執屋都無時間

Hana同老公仔結婚兩年，生活穩定又幸福，點解會突然想開麵店呢？「有一次返重慶老家，見爸爸煮緊辣椒，好享受咁嘅樣。飯後我地傾偈，講笑話爸爸咁鍾意煮嘢食，老友都大讚佢煮得好味，不如試吓喺香港開餐廳。我返到香港同老公討論，覺得風險唔算高，不妨一試，同爸爸一齊追夢！」

不過做老闆都真係好攰，尤其是初創階段，Hana兩公婆由朝到晚都要返舖頭幫手。「我自己完全無飲食業嘅經驗，開麵店真係一步步摸索條路出嚟。一開始為咗控制成本，我哋唔敢請太多人手，員工得一個，午市、晚市人客最多時，都好手忙腳亂。其實老闆即係打雜，由定菜單、搵供應商到煮麵、洗碗都要一手包辦。我連執屋都無時間，間屋好亂，哈哈！」

打工生活穩定，創業就好自由

咁以前打工好啲定係而家做老闆好呢？Hana話真係各有各好：「以前打工，時間同收入都好穩定，想幾時約人出街或者處理任何嘢，都好容易安排到；另外，我嗰行工作環境、人事關係都比較簡單，但係生活就冇乜變化同挑戰性。」

「至於做老闆，返工時間同工作上嘅決定全部都係自己安排，好有彈性。不過相對而言，心理壓力真係比打工時大好多，每日都會擔心營業額夠唔夠。我哋兩夫婦要輪流幫手做晚市，十點先關門，所以開店到而家，差不多半年都無一齊出去玩、去旅行、去拍拖；就算收舖夜晚返到屋企，都係諗點樣去提高營業額同改善現有問題。」不過Hana同老公都覺得一直打工嘅話，則使幾投入、幾畀心機做都好，都只係有固定收入，所以決定趁後生闖一闖。

做生意追夢 最緊要實際

麵店開張頭幾個月，Hana都做到收支平衡唔蝕錢，到第五個月，仲已經回到一半本，非常厲害，佢話關鍵係控制人手開支，同埋揀舖位要實際。「開餐廳最緊要考慮店舖規模。如果規模大，成本會比較高；規模細，就要預咗自己投入更多時間幫手。我哋喺店舖上資金投入唔算多，連按金同裝修大約用咗40萬。我哋都唔識食肆牌照嘅要求，所以搵舖位時都係搵上一手都係麵店格局嘅舖位，又可以用返啲煮食工具。」

而家Hana嘅麵店生意上咗軌道，返舖頭都係主力喺樓面幫手，或者準備食材、檢查一下肉嘅質素等等。就咁聽落好似好輕鬆咁？「一啲都唔輕鬆！因為心理上已經預咗要24小時On-call，一有時間就會想落鋪幫手，可以話冇晒私人時間。不過換返嚟嘅係心態上嘅自由，自己想點安排就點安排；同埋見到客人欣賞我哋嘅食物，食得開心嘅時候，自己都好有滿足感。」

所以話，打工同創業，真係各有所好。創業所得嘅經歷同成長唔係一般打工可比；不過，如果你曾經幻想過做老闆係好梳乎、好有Work-life balance、淨係點人做嘢嘅話，創業前真係要諗清楚先啦！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。