疲症之下,餐飲業大受大打擊,不少餐廳食肆暫停營業,甚至捱不過來直接結業。業內打工仔人心惶惶,偏偏小編請來的這兩位90後廚師卻表示:「唔怕!」兩人分別在大型機構擔任廚師:Ryan現於知名會所的中餐廳擔任頭鑊,入行8年;Tony在飲食集團旗下的中餐廳擔任部門主管,入行12年。談及入行經歷,兩人的遭遇截然相反,有兜兜轉轉,往來商界和廚界;也有誤打誤撞,由茶餐廳「𡃁仔」做起。直到今日,身懷好廚藝,事業小有所成,即使經濟環境未必理想,也不懼怕。
Ryan中五畢業後直接進入中華廚藝學院,那一年是2010年,最後一屆中學會考,他說:「我從細到大都唔係讀書嘅料,最尾三個實有我份 ,明明我個人都唔算好蠢,但就係讀唔成書。阿爸做廚,咁好自然就諗返入呢行,於是就去讀廚藝學院,打算拎張沙紙先入廚,唔使由𡃁仔做起。」中廚世界稱呼剛入行的新人為「細路」或「𡃁仔」,日常工作和廚藝完全無關,主要是打雜和清潔,以及別人吩咐什麼就做什麼。
「讀書期間有啲實習,入到去廚房覺得同我細個嘅印象差天共地。以前跟阿爸去廚房幫手,油笠笠、成屋煙、污糟邋遢,但而家就好乾淨企理,同埋所有嘢都好系統。仲可以去美國迪士尼嘅餐廳實習,覺得好新奇,都好現代化,原來我唔止係『廚房佬』咁簡單。」他補充說明,中廚現時已自成一套系統,無論是人事升遷,或者廚房的職責分工,都一清二楚。初級廚師月薪大約為1萬2、3,其後可以逐級晉升為廚師、中級廚師、主管、副總廚,行政總廚(簡稱「廚房大佬」)。升遷時間難以一概而論,視乎機遇和廚藝,通常約8至15年。普通中餐廳的行政總廚月薪大約3萬起,星級餐廳,出名廚師另計。
▪ 失業搵唔到工點算好?10個低成本創業及搵錢Idea兼成功例子
▪ 轉工唔再得個講字:向有興趣的工作埋手 比憑經驗搵工更有推動力
他擔任的「頭鑊」在晉升階梯中下一步便到達副總廚,笑說:「鑊真係指一隻鑊啊!呢個係根據工作內容嘅稱呼,中餐廳嘅煮食工序分為兩條主綫,一係眾所周知嘅『爐頭』綫,拋鑊拋到火光猛烈;二係『砧板』,負責切割材料,處理貨單及盤點等管理工作。鑊都可以好詳細咁分為尾鑊、三鑊、二鑊、頭鑊⋯⋯總之愈後資歷淺,炒啲輕巧嘢,愈前就愈勁。但細餐廳就無分啦,一個人做曬!」大型中餐廳或集團式中餐廳現時程序分明,流水作業,一味菜式從材料準備到成功出菜,全都條理分明,雖然沒有Gordon Ramsay廚房那樣光鮮亮麗,但也絕不是大眾印象中的油煙紛飛,刀光火影般混亂。
Tony是由「𡃁仔」做起的,沒有經過學校的洗禮,身邊也沒有親友教路,憑的全是一個字:捱。他笑說:「我16歲就由茶餐廳做起,成個廚房得3個人,咩都要做,老師傅跟舊時嗰套,對待徒弟粗聲粗氣,鬧你就係教你嘢,自己醒水睇住嚟學。學到手藝就應份嘅,學唔到就係自己蠢。日日朝6晚12,手腳要快,任勞任怨,初時真係想放棄,但因為我除咗鐘意煮吓野嘢,真係一無事處,唯有頂硬上。」當年月薪是4千,時至今日月入4萬多,12年的時間都在廚房打滾,見證行業變遷!
近年來,廚房人手愈見短缺,愈來愈少年輕人入行,促使中餐廳變化形象。他笑說:「唔止係食客見到嘅裝修,連廚房內部都係,都係為咗改變形象引新人入行。雖然而家待遇好咗,但係香港隨便做個文職都1萬頭喇,後生仔邊有人願意咁辛苦入廚房?日日對住啲油煙,皮膚又差;更唔好講工時超長,朝9晚11,落場又做唔到啲咩,冇晒私人時間。紅日例牌開工,拍拖都難啦!呢啲硬傷點都係度,你問10個廚,9個都會咁答你,仲有係1個星級廚師就唔計。」包括他自己,即使已經身為主管也同樣深受困擾,假日總是沒法陪伴家人,平時收工回到家仔女都睡了覺。
除此之外,廚房的工作本身也非常辛苦。每日面對火爐,精神高度集中,稍有不慎,火花四濺,手背即時受傷紅腫。加上雙耳鐵鑊重量不容小覷,拋鑊飛水走油,反反覆覆,手臂酸軟,長時間下來還會形成患舊。Tony感嘆:「食得咸魚抵得渴。中廚真心辛苦,但我啲手藝會不斷增值,以後仲可以繼續升,人工又會更多。」
明白這個道理,仍願意入行,前途才能一片光明。Ryan雖然入行8年,但也走了冤枉路,入廚2年後曾轉工,1年後才回歸廚房。「做廚太辛苦了,之前上堂和實習只係做一段時間就完,同埋一班同學一齊,日日都當係玩喇!到真正入咗行先明嗰種辛苦原來要跟一世,就打咗退堂鼓。之後跟朋友入行做保險,先發現唔適合自己,加埋搵唔到錢,兜兜轉轉最後入返廚房,經朋友介紹去咗會所中餐廳做見習廚師。阿爸話我好命,唔使好似佢當年咁由執垃圾做起,哈。」
▪ 【炒散攻略】兼職炒散做餐廳酒店侍應,勝在夠自由,賺取現金流
▪ 人工10年前後對比:IT、會計、Marketing入門級職位 升幅最少係佢?
對於新人入行,Ryan認為單憑對廚藝有熱誠是不足夠的,更加重要的是要有「捱」的心理準備,不要幻想一入行就能煮出獨一無二的驚人美食。「唔好諗住好快做到Gordon Ramsay,所有菜式都有程序跟,大家做嘅只係眾多步驟中嘅其中一步。自己要做嘅係不斷累積個人經驗,向前輩偷師學多啲手藝。而手藝又分為好多方面,要搵到自己嘅專長。例如點心,呢行勁嘅點心師傅唔多,但愈來愈有市場,唔止香港,海外飲食行業都有需求。」
受疫情影響,不少中餐廳的生意都大受打擊。但他們兩人都直言:一啲都唔怕!Tony認為,香港人口老化,現時入行年青人少。即使有新人入行,也未必人人都能適應廚房工作,流失率高。所以一個擁有一定技術和資歷的年青廚師頗為搶手。「一間餐廳要培養一個廚師出嚟,投入嘅資源比你想像中更多,唔會輕易畀佢走,更加唔會輕易炒人。要開刀都郁樓面嗰啲先,再請返好易,但請返個廚就好難。!」
Ryan宏觀香港生活習慣,表示上車盤沒有最細只有更細,當住屋連一個廚房都沒有,大家都習慣外去用餐,廚師的絕對不愁前景。「而家係少咗人去餐廳坐低食野,但買外賣嘅人就大把,我地廚房依然都係忙到踢晒腳!」
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。