Add又死唔Add又死,如何拒絕八卦同事好友邀請

social media

自從有social media,你我都一窩蜂全情投入打卡、自拍、五香肉丁餐蛋麵都同人分享嘅瘋潮。私生活俾親朋好友知當然冇所謂,但萬一你公司有啲擅長將是非當人情嘅同事﹝或老細﹞ 主動加你為好友,唔接受又驚得罪佢,接受咗又驚冇晒私隱,block佢包你冇運行,咁應該點做?

開設專屬公司方便扮friend的帳戶

如果你的八卦同事網絡龐大,不妨開設一個專屬公司方便扮friend的帳戶,當作是你的「官方」主頁,實則隔絕任何與私生活有關的相片或文字,亦唔好寫任何關於工作及同事嘅感想,放啲無關痛癢嘅貼文,避開一切敏感話題。俾同事覺得你係大悶蛋兼冇朋友,總好過私隱成為別人茶餘飯後是非精嘅話題。

old school,聲稱唔玩Facebook

假如你公司班八公八婆開口問你個Facebook帳號,你可以扮晒老套講明冇興趣玩。不過大前提係你在私隱設定已揀選「不公開搜尋」及「不接受好友邀請」。但咁做都唔係最保險,因為唔排除有同事認識你現時的好友 ﹝世界畢竟好細小﹞。如果唔想俾佢哋搵到你主頁,就唔好公開私人性質的東西,特別係有你嘜頭嘅美顏相,仲要謹記將帳戶改成同你個名完全無關的名字。

限制性分享貼文

萬一你真係唔好彩,俾同事或上司搵到你個主頁,又發埋好友邀請,除非你即將離職,否則無論你選擇無視或拒絕,後果都係死路一條。其實你可以照加佢哋為好友,不過將佢哋列入為「限制」名單,平日貼文可選擇性公開俾呢班「限制」好友睇。當然要自然啲唔好個個post都收收埋埋,間唔中扮吓轉發一些同私生活無關的貼文,即使佢哋24小時追蹤,喺你身上都唔會發掘到有趣話題,自然會轉移視線。

緊記貼文遊戲規則

無論你社交網站有冇加同事上司為好友,都要謹記在辦公時間內,唔好發貼文亂俾like。因為喺社交網站嘅一舉一動,唔排除有公司人暗中查探。就算工餘放假都要格外小心,睇清楚公司人係咪真係大方冇所謂先好分享私生活,試過有單身上司唔扺得下屬假日旅行晒恩愛狂PO幸福潮文,俾上司喺Facebook留言暗寸:「幾時返?」就冇癮!雖然講到好詭異,但事實勝於雄辯,曾經有好多實例,最多人談論嘅「死罪」,係有人請病假當日上載吃喝玩樂的相片,老細發現後,立刻成全佢哋發放永久長假。