AM人?PM人?抓緊專屬開Turbo時間

黃金時間

唔少打工仔朝早返工個樣唔係睡眼惺忪頭耷耷,就係口黑面黑好似五行欠打。然而,亦有打工仔精神奕奕,早上辦事效率特別高,但一到下晝個turbo就好似死機咁,越做越漏氣。無論你係屬於以上邊類型,睇睇以下小貼士,或會助你提升工作效率。

AM人:晨曦黃金一小時

如若你是越早越精神一族,一起身頭腦清醒完全叉足電冇頹氣,建議你不妨平日再早起一小時。例如九點返工,你就提早八點踏入辦公室,當同事未返齊,環境寧靜兼冇人干擾,最適宜處理最艱澀、最複雜的工作項目。假如公司冇咁早開門,你可以在家利用電腦先行完成部分工作,之後上班時心情自然會輕鬆啲。

PM人:縮短食晏時間,或改食tea

踏正一點,打工仔就最興奮,捱得咁辛苦都係為咗呢一刻。但如果你朝早未「回魂」,到食晏時間發現好似冇乜正經事做過咁,點算呢?嘗試利用食晏時間處理最「棘手」任務,趁公司冇咁多人,你又開始「回魂」,自然可以集中火力衝刺,之後去吃一頓豐盛茶餐(其實是午餐),食都食得安心啲。公司冇彈性午餐時間?你可自行將食晏時間縮短,早十至十五分鐘返回公司開工,表面上係犧牲食晏時間,實際上你趁醒神的時刻開始處理繁雜項目,午後的工作效率也會逐步提升,早啲收工就係賺啦﹗

全方位隔離,避開吹水群組

無論你是AM人,還是PM人,一天內總會有兩至三小時頭腦最清醒,工作效率特別高,在這段黃金期務必要全面開行turbo,電腦只開啟要處理的檔案,集中火力完成手上工作,避免進入茶水間或公司內的吹水群組(真實或IM都要遠離),確保自己進入全面隔離狀態,以便集中精神處理最艱巨的任務。

每隔一小時做些簡單工作

任何人長時間工作,因集中力減弱而導致工作效率逐漸下降;因此,每隔一小時,可處理一些簡單任務,如查閱比較次要的電郵,或寫下明天的工作清單,設定於五至十分鐘內完成。然後喝一杯喜愛的飲料,讓腦袋清空一下,放鬆一會,當你重返工作崗位,便能夠回復精力,繼續努力作戰﹗