上回提要︰收到公司或者獵頭公司嘅電話之後，當然係寄望有Interview 啦！如果得到面試機會，又可以點樣做好準備？
1. 我應該早幾多去到 Interview 既地點？
R 姐姐 （公營機構HR）︰如果僱主冇特別要求，大約早15分鐘到就差唔多啦！
SW （企業面試官）: 早10分鐘左右就Okay，唔好早太多。因為Interviewer 本身都有其他工作，如果太早到會打亂interviewer 嘅計劃。而早到等待嘅期間，可以冷靜一下自己，亦可以熟習一下公司環境。
2. 如果Interview 遇到唔識答既問題可以點應對？
R.D. （國際獵頭公司Recruiter）︰首先要保持冷靜，唔好答「唔知道」。嘗試去了解同分析問題，選擇回答識嘅部分，再加以解釋其他相關議題，起碼比人感覺有誠意。
R 姐姐 （公營機構HR）︰盡量答到幾多得幾多啦！如果真係唔識，一個字都講唔出，唯有坦白同面試官講，好過答完一堆天花龍鳳嘅嘢，先比人發現你吹水呀！
▪ 面試見工想改時間至放工後？HR 揭祕：5大搵工interview常見問題
▪ HR 揭祕！搵工遇著同一招聘廣告登完又登、冇公司名係咩原因？
3. 我應該用點樣既風格去回答問題？正經、認真、幽默、專業、資訊性？
A sir （資深IT Recruiter）︰睇interviewer同公司。喺成個interview過程，有部份係睇你可唔可以融入到公司文化，建議觀察interviewer同用你對公司嘅了解去決定風格。大路嚟講，用「正經」同「專業」風格，通常都唔會扣分。
SW （企業面試官）: 好睇個份係咩工作，同埋問嘅問題方向。如果係需要Creative 嘅工作，利用幽默嘅風格的確會令人留下深刻印象，增加好感；如果係專業嘅工作，講求專業知識，就建議用返對應嘅Style，但適當嘅幽默感都係唔錯嘅加分位。
4. 我答問題既時候，見到HR 寫左好多野，究竟HR 係會抄啲咩？
Miss M （金融機構HR）︰哈哈，我會寫好多野，包括︰相關工作經歷、具體內容，人工要求、需唔需要工作簽證…（當然有時係做下樣，記啲廢野）其實睇個HR要同上司present 啲咩，因為HR見完要向上一級拎approval，咁上一級就會問東問西，所以負責面試嘅HR需要記低，怕自己唔記得答唔倒。
C 小姐 （香港大型企業HR）︰多數HR 會驚自己唔記得問左咩，會抄返啲重點，方便之後同Department Head討論。
▪ HR 揭Head hunt之謎！唔講公司名係咪呃人？應否主動找獵頭人搵工？
▪ 伏工有特徵！3大方法見工面試避免中伏 公司風評好壞有得check
5. HR 點樣既反應或者回應，先係代表我答得好、或者份工成數高？
Miss M （金融機構HR）︰基本上你見完部門主管後，再被HR召見就代表部門已經想要你；HR只係睇下你有無啲騎呢野，同埋人工係唔係budget 以內等。
C 小姐 （香港大型企業HR）︰如果HR主動同你傾package同availability，咁就代表成數高啦！
6. Interview 臨完結既時候，成日都會問我有無問題，其實我應該答咩？定唔問都得？
A sir （資深IT Recruiter）︰唔會逼你問，但正常你想join間公司，都應該有興趣想問吓份工、條team或者其他公司資料。注意︰唔好問5分鐘Google 搵到嘅嘢就得。
R.D. （國際獵頭公司Recruiter）︰除了真係有疑問之外，呢部分亦係為自己加分嘅好機會！ 可以問嘅例子︰「你期待我可以為公司帶到咩contribution？」，或者公司未來發展方向等，以表現對該職位嘅興趣。
除著時代轉變，Interview 嘅形式都變得五花八門！下次繼續同大家探討各式各樣嘅面試疑難！
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
