HR人有苦自己知
講起一間公司入面最多人鍾意「聲討」嘅角色，除咗老細之外，一定非HR莫屬。喺好多網上討論區中，HR都被塑造成為以壓價為樂，同老細狼狽為奸嘅邪惡軸心。但其實HR人都好想講，事實唔係咁㗎！
1. HR最多咪睇吓CV，in吓人，我自己做都得啦，駛唔駛俾錢請成條team返嚟呀？
HR人表示：任何行業嘅entry level都係做簡單嘢先㗎啦，不過到你慢慢做上去，就會成為一門專業，由招聘、計糧、計假、員工福利、報稅，到培訓、employee engagement、包辦公司活動，出咗事要賠錢、補假，勞工法例要隨口背得出，員工做錯嘢要識拆，講嘢要好小心免得俾人話公司觸犯歧視條例；要做到上位，仲要讀埋HR Master、MBA。如果喺大公司做，一個唔好彩啲人罷工，我哋就要肩負起化解呢場怒火街頭嘅重責。宜家你仲係覺得好易做？
2. 係呀，你哋好忙呀，training永遠都唔會批，炒人、cut福利同bonus你哋就最拿手。
HR人表示：其實好多時背後我哋付出咗好多努力向老細propose，同你哋爭取多啲，但最後唔批。呢啲嘢其他同事未必會睇到，但往往send封email出嚟嘅係我哋，於是我哋變咗醜人嘅角色，俾全公司詛咒。遇著個躁底嘅問候哂我全家，你估好好玩咩？嗚嗚。
3. 點解你哋咁鍾意壓價？你有冇考慮過我哋見工嘅感受？
HR人表示：事實上，請每個post都會有budget，公司又有哂market data要跟。講真，你出糧又唔係我俾錢，我寧願公司開高啲budget，可以有效率啲fill咗個vacancy。但大多數情況係，見完十個人都話唔啱，然後又日日俾人chur話等人用，真係左右做人難。
4. 咁我咪一早寫咗expected salary囉，唔啱又叫我去見，見完先嚟壓價，玩嘢呀？
HR人表示：其實如果個開價係喺budget range附近，我哋想會約見，因為有時line manager見完之後，覺得真係好正、好啱用，但係開價高過budget，都會同老細fight吓，有時真係會俾到，但如果唔批都冇辦法，咁咪唯有講返個budget你聽，睇吓接唔接受到囉。調返轉，有啲candidate真係好想入嚟做，或者聽完個package覺得其他福利可以拉上補下，都會接受㗎。
（以上純粹HR小薯嘅一啲諗法，不代表所有HR立場，歡迎各界HR同業電郵我哋提供更多資料，謝謝。）
延伸閱讀：
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
