從IG shop到online shop：小本創業的4大問題 你一定要知

今時今日，時常聽到身邊的朋友說要創業，不再做朝九晚五的打工仔。問起創甚麼業？聽得最多的呢，一定是：開網店。乍聽之下，以為事情很容易，畢竟誰不懂網購呢？實情卻事與願違，小編請來兩位開網店的老闆，細說創業路上的一些簡單小問題，是如何難倒他們的呢！一位是自製護膚品，從早年的IG店，再開辦自己的網店；一位是母女陣試場，自製寵物親子服飾，沒有社交媒體鋪墊，直接創店。

C：開設天然護膚品網店，2018年中創立

K：創辦本地精品平台，網店在2018年創立

第一：開銀行戶口  等到花兒也謝了

平日，隨便走入一間銀行，即可輕而易舉地辦理個人戶口，可惜開設公司戶口就難過登天，謹記預留最少3個月的時間！K的創業第一步是開設有限公司，取得正式商業登記證。她笑言：「開一間公司好簡單，坊間有好多專門幫人開有限公司嘅公司，一條龍服務，收費由$3,000幾到$5,000幾不等，愈貴愈快搞掂亦都包得愈多嘢。我就揀咗包晒嘅package，有齊BR、CI、綠盒、公司股票簿、公司章程、公司印等，同埋連公司秘書服務1年，咩都唔使煩，7日搞掂。真正嘅困難係開銀行戶口！」她分別向大新、東亞及中銀申請公司戶口，前者存款限制較低，後兩者較高，原本以為1至2個月能夠完成，沒想到最後足足用了6個月的時間。

「中銀和東亞淨係預約第一次見面都要等成個月，於是放棄喇！專心等大新銀行，8月交晒資料，前前後後步驟多到數唔晒，足足等到第2年嘅2月份先正式拎到銀行戶口。期間收錢要用個人戶口，條數非常混亂，都影響客人信心。」近年來，銀行日益重視Anti-Money Laundering（反洗錢），不斷收緊開辦公司戶口的門檻，以免戶口成為洗黑錢的工具，甚至有機會受到美國制裁。

▪ 萬事起頭難？七成Startup失敗收場 前員工：「計劃永遠趕不上變化。」

第二：收錢唔簡單  支付方式仍傳統

開戶困難重重，也限制了收錢的途徑。C表示，IG店年代一切還是小打小鬧，小本經營，收到訂單才製作，不用存貨，也不需大量入手原材料，視作正職外的額外收入，出入數當然都是經個人戶口。隨着發展壯大，客戶增加，訂單穩定，她想專門發展這門事業，於是辭去正職。「始終IG或者Facebook唔係好正式，我決定搞個網，專業啲之餘又可以系統性咁處理訂單，咁先可以長遠發展落去。影產品相、寫介紹、整網站⋯⋯2個幾月完成，但係支付方式都係得銀行轉帳，或者Payme到我個人帳戶。未有公司戶口嘛！」

K補充，網購愈來愈流行，加上Payme等電子支付方式的普及，2018、19年明顯較多人接受電子支付。「2018年底，我推出網店，當時大概6至7成嘅客戶都係用銀行過數，佢哋覺得穩陣啲。當時又未有公司銀行，無得用商業PayPal、Alipay，Payme又未出商業版，都幾麻煩。之後有公司戶口，先可以用商業版的PayPal、Payme，同一時間愈嚟愈多人接受到online payment，而家大概7至8成嘅客戶都係用Payme。」她提醒大家，如果打算開網店，請留意這方面，始終用個人戶口收錢不是長久之道，待公司報稅時也是一個麻煩。

第三：一路順風？運輸路非易事

K和C兩人同樣表示運輸也是意料之外的困難。C笑講：「我一直用順豐寄貨，以前未正式搞網店前，數量唔多，每次幾件，都無咩錯漏。但係當正式做網店，訂單愈嚟愈多，但又未到可以請人嘅情況，我要自己包貨。對單、執貨、包bubble紙、入盒、入寄件單，不斷循環，比想像中更累人。最怕係有時入錯電話，客人收唔到份件會怪罪。」運輸的主導權不在她手上，除了自己出錯，運輸公司也有機會寄錯地點，甚至是打碎貨品。

K細數運輸的最大難題──運費。作為小本經營的網店，盈利未見明朗，總想盡可能降低成本，可是運費這一項就由第三方公司控制，一旦運輸公司加價，成本即時上升。「好多細網店都係用順豐，根本無其他揀，但順豐運費於2019年上升咗50%，包郵嘅成本上升，都降低埋客人嘅購買慾。喂呀，買$100少少嘢，運費要成$30幾，畀我都算數啦；或者想等多啲嘢先買，但等等吓就走咗個客㗎啦！」

▪ 【內容營銷】Content Marketing在推廣甚麼？助品牌軟性入侵消費者思維

▪ 大公司=福利好人工高準時收工？ 細公司=福利少人工低OT到暈？

第四：宣傳靠社交媒體   多多錢都唔夠

如何推廣及宣傳網店呢？當然少不了Facebook和IG啦！其廣告政策時常更改，需要投放大量心力，不然便成了「財到光棍手，一去無回頭」。C作為外行人，初時賣Facebook廣告，以為選好受眾就能投放，成效當然強差人意。後來參加課程，才知道賣廣告也學問多多。

K笑說：「我都係做落先知，原來有好多途徑賣廣告。而除咗廣告，都有好多工具要學識用。例如Facebook可以用manychat等平台，直接做message broadcasting、chat robot。同時網站又要賣吓Google廣告，強化SEO。我係外行人，想要推廣市場，咁多渠道都唔知點搞！哈哈哈！頭都大，但都要慢慢學識。」（有錢請人另計，自己一個one-man band就要理嚕！）

開網店的門檻的確比開實體店低些，本錢也較少，如果你打算成為其中一員，創業打自己工，除了以上4大難題，更要有「一個打十個」的心理準備。最高級係自己，最低級也是自己，仰天大笑，CEO／打雜／會計／設計／Marketing／Sales／倉務⋯⋯甚麼都要做啊！24小時工作中，腦袋每秒都記掛着盤生意，沒有明確收工時間，即使旅行也要回覆客人。相反，你也可以不回覆不工作，後果很簡單，少一張單嘛！反正自己生意，走多遠發展路都由你決定。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。