Interview時絕不能說出口的心底話

Interview時絕不能說出口的心底話

面試是僱主測試求職者溝通及待人接物技巧的重要環節,全程保持禮貌及專業的態度是基本要求。就算聽到多無理、刻薄的說話,內心有多氣忿,都不可以表露真正的一面!自問性格火爆的你不妨參考以下應對,預習將mean mean豬的真心話翻譯成為大方得體的回應,提升獲聘的機會。

僱主說:你用英文介紹吓自己先?

試著說:First of all, thank you for giving this opportunity to introduce myself. My name is….
不要說出心底話:咁不如你用英文問呢條問題先?

僱主說:人工我哋可以畀到$X,000,你O唔OK

試著說:我認為我的經驗和能力值得更高的水平。
不要說出心底話:有冇搞錯,CV寫咗幾多錢就幾多錢㗎啦,請唔起又叫人interview,老鍊咁遠出嚟嘥哂我啲時間!

僱主說:我哋公司有時需要彈性上班時間,亦唔會提供超時補水。

試著說:如加班時間在合理範圍內,我可以接受。
不要說出心底話:OT冇錢?你食飯唔好畀錢得唔得呀?
 

僱主說:點解你冇做上一份工?

試著說:我覺得上一間公司無法提供我希望的發展前景。
不要說出心底話:咁點解你冇做上一份工吖?問咁多嘢,家陣相睇呀?
 

僱主說:你嘅學歷唔係好符合我哋要求喎。

試著說:我會在工餘時間持續進修,希望貴公司給我機會。
不要說出心底話:我咩學歷咪寫哂喺CV度囉!仲要問?乜你唔係睇過啱先叫人嚟in㗎咩!?
 

僱主說:我哋budget未必夠請你喎,你個expected salary係咪minimum?

試著說:我們可以討論其他福利的細節。
不要說出心底話:梗係minimum啦,唔通maximum呀?
 

僱主說:可唔可以講吓你有啲咩缺點?

試著說:我做事有點完美主義,有時把自己弄得精神緊張。
不要說出心底話:我都唔會老實同你講啦。
 

僱主說:點解我哋要請你?

試著說:因為我對貴公司的業務非常有熱誠,並相信自己的工作能力與專業知識能夠勝任此工作。
不要說出心底話:咁點解你要喺jobsDB落廣告啫!?
 

僱主說:如果我話唔請你,你會點

試著說:我會檢討自己有何不足之處。
不要說出心底話:唔請咪搵過第二份囉!你唔係以為自己係大爺,要我跪喺度求你下話!

 

延伸閱讀:

[問到口啞啞]見工壓你價口術大全

打工仔連環不幸事件──見工中伏篇

HR人有苦自己知

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案