IT人印度出trip記

一講起印度,我諗好多人第一樣諗起嘅係印度咖喱,第二樣係佢哋係用手食嘢,第三樣係「食洗屙」都喺恆河。而網上亦都流傳好多謠言,例如話去印度玩,不出十日一定肚屙云云。

喺咁嘅認知下,當我知道要去印度盂買公幹兩星期,真係覺得自己係去送死。


盂買印象

由香港直飛印度嘅航班唔多,好多都係夜機,預計到達孟買機場時間係23:55,冇人冇物,又冇當地sim card,仲要咁夜,當然會擔心人生安全。我好驚第一晚就已經俾人劏死牛,錢事少,命事大,所以我喺香港就已經叫定酒店安排機場pickup。不過,過完關,拎得行李嚟,都已經點幾鐘。當我一出機場門口,多人到呢……比香港機場更墟冚。整個畫面都係人,而大多數都係舉住牌嚟接人的。好在我好快就搵到酒店司機,但當時已經係深夜兩點……香港時間04:30。

現時人口最多嘅國家係中國,印度係排第二,有十三億人口,由於面積唔大,所以其實人口密度好高。印度係一個好貧窮嘅國家,大部份嘅印度人都係好低收入,甚至冇收入。喺孟買街頭所見,好多人霸路為家,行人路一早俾人霸晒,所以人要行,就要行車路。而呢度比大陸更混亂,人車同行,車同車之間夾雜行人,見到都覺得牙煙。

IT人印度出trip記

雖然孟買係大城巿,但係街上面都係遍地垃圾,氣味同垃圾房冇分別。所以本地人都好少出街行,假日都只會留喺屋企。由於基建太差,就算有metro都好,出入口唔多,地點亦唔方便,所以搵到錢嘅多數都會揸車,而唔會撘metro。亦因為咁,孟買幾乎任何時間都係塞緊車,返工放工時間就更加唔使講。

IT人印度出trip記

而收入低微嘅本地人就會撘巴士。由於印度曾經被英國統治,所以呢度都有單層同雙層巴士,而且仲係用緊熱狗巴士。因為每次都載人太多,基本上唔會閂門,啲人就會迫到出門口,但車照開。火車都一樣,車門唔會閂,就算高速行走時都一樣開住門。

IT人印度出trip記

呢度嘅的士一啲都唔貴,坐45分鐘至1小時,大概450盧比,即係50蚊港紙左右,所以我主要都係坐的士。呢度叫的士可以用app,又或者可以用Uber叫車,如果自己出街截車,反而好大機會俾人呃錢。


印度IT人

今次嚟印度嘅目的係公幹,當然有唔少機會同印度同事交流啦。咁印度嘅IT人又係點嘅呢?

其實,印度人絕大部分都係窮人,所以有工做已經係好好,因為有穩定收入。而有收入同冇收入,簡直就係差天共地。講白啲,我啲同事個個喺印度嚟講都算係有錢人,仲要係財大氣粗嗰種。佢哋好proud of自己讀咗好多書,又好proud of自己識英文。不過老實講,其實佢哋唔係好知自己講英文嘅口音,連地道嘅英國或美國同事都未必聽得明,更何況我哋呢啲英文唔係母語嘅同事……但係,佢哋會覺得只係人哋聽唔明,而唔係自己口音嘅問題。

呢個情況都會伸延去其他方面,例如工作態度上。話說當時個system出現咗個bug,啲客投訴,件事去到印度同事手中,第一件事就係話:「呢個唔係bug,而係一直都係咁嘅」,然後就用拖字訣,問個客攞log、攞screenshot;到個客畀晒,又話要佢哋清楚講返當時做過啲乜,list返晒啲steps出嚟;到個客再畀晒啲嘢,都已經拖左一個月,然後就話:「好啦,我哋幫你fix啦」,跟住一直fix、一直fix,直到幾個月後先fix好。個客其實已經move on,己經唔記得有呢個bug。

先戴一戴頭盔,我咁講絕對唔係種族歧視,以我同香港、大陸、印度嘅同事交手嘅經驗,香港同大陸都有好多難搞嘅同事,但如果同印度相比,大陸人已經容易溝通好多。

至於佢哋嘅IT水平又點呢?我只能話世界上所有讀大學嘅人其實都係讀緊同一個level嘅嘢,就算係哈佛劍橋又如何,都係讀緊大學應該讀嘅嘢。而印度喺各個產業相比之下,IT算係比較做得好,所以可能就畀人覺得「印度IT好掂」嘅印象。

講返轉頭,請印度人嘅好處就係平,同埋其實佢哋係好少會話唔肯OT,可能因為佢哋真係一工難求啦,當人人都搵唔到錢,而你有份工喺手,咁你幾辛苦都要keep住份工啦。


最後到底有冇食到肚屙?

同一大班同事出去食飯都幾麻煩。九成九印度人係唔食牛嘅,因為佢哋覺得牛係神聖嘅;部份人因為信仰而食素,或者唔食豬;少部份人係乜都食。餐牌上一定會標明邊啲係素,邊啲唔係。如果要買手信請印度人食,最好係素的。

印度人都會食飯,而佢哋嘅飯係長身同乾身的,同珍珠米係兩個極端;除咗飯,印度薄餅都係主要食糧。不過飯又好,薄餅又好,印度人主要都係撈醬汁一齊食,仲要係汁多過飯咁食。印度人整醬汁有一手,醬汁主要係咖喱,原味係好辣好鹹的,同埋加咗好多不知名嘅香草,味道係唔錯的。不過,大部份嘅印度食物都係濃味為主,而且唔係好健康,香港人應該好唔習慣。

IT人印度出trip記IT人印度出trip記

印度人用手食嘢係人都知,但有冇諗過佢地食嘢前後會唔會洗手?答案係NO。以我嘅觀察,無論何時何地,之前掂過乜都好,佢哋都可以即時用手食嘢。我相信佢哋有超強抵抗力……而食完嘢之後,我無見過佢哋洗手,然後又可以繼續揸車,或者做其他嘢,喺我眼中真係好amazing。喺呢個兩星期嘅行程,我乜都食過晒,但好在冇肚屙。

留喺孟買嘅最後一日,我安排咗冬甩請全office嘅同事食,大概要120個,你估吓幾錢?大概係6000盧比,即係600-700蚊港紙,平均一個冬甩大概係5蚊港紙。其實算貴,因為呢度叫一個外賣飯,大概都只係150盧比,即係十幾蚊港紙。

最後,你估吓呢度買樓要幾錢?我問過同事,一般大概1000蚊一呎,即係香港樓價10分之1。不過,你想唔想喺呢度住呢?我自己就唔想喇。

 

Sam Yung

 

在香港IT界打滾多年,從一個小小的Programmer開始奮鬥,到成為某大公司的IT管理人員,親歷科網泡沫爆破後,香港IT界慘不忍睹的境況。網誌:香港IT人

 

檢視此作者的所有文章

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

延讀閱讀:

IT人搵工攻略(4):Interviewer問我有咩想問返佢,我點答好?

今日係我嘅last day(1):新仔programmer篇

香港IT人:下一份IT工是天堂,還是地獄?

 

想尋找你下一個機遇? 立即瀏覽jobsDB最新Information Technology (IT)職位