IT人搵工攻略(4):Interviewer問我有咩想問返佢,我點答好?

IT人搵工攻略(4):Interviewer問我有咩想問返佢,我點答好?

無論做咩行業,見工形式係點,見HR定見將來直屬上司,到最後九成九都有個Q&A環節,會問返你有冇咩想問。初初出嚟做嘢嘅後生仔女,好多時都冇準備,唔知問乜好。其實呢個環節好重要。

Q&A環節一般都喺成個interview嘅尾聲進行,嚟到呢個時候,個interviewer可能已經有idea請唔請你,亦有可能會十五十六,唔知請唔請好。原因可能係因為你嘅工作履歷只係「雞肋」,即係請你又唔會幫得太多,但又要花時間去教,亦可能因為有另一啲candidate同你差唔多。呢個時候,Q&A就係俾你爭取到呢份工嘅重要環節。


咩問題唔應該問?

首先,我想講下有咩問題千祈唔好問,問親就死硬,可能原本好想請你都變咗唔請。

1. 請問如果我入嚟做,需唔需要成日OT?

問得呢個問題,interviewer就覺得你嘅潛台詞係「我唔想OT」。除非真係非請你不可,如果唔係,即刻就扣分。


2. 請問呢份工其實要做啲咩?

睇落呢個問題好似冇問題,但其實諗深一層,乜你原來唔知你in緊份咩工㗎咩?咁你又apply?即係話你對呢份工,甚至呢間公司做乜都唔太了解,想唔扣分都難。


3. 請問你哋會唔會請我?

喺呢個時候,其實interviewer真係唔知請唔請,你問呢個問題其實只係為難個interviewer。就算你真係勁到一定要請,佢都要同HR商量一下,未到最後都唔知結果。

中國人始終比較含蓄,佢唔會直接話你知請唔請你,但一般而言,如果interviewer好快已經對你冇興趣,其實個interview 15分鐘就完;如果可以進行到45分鐘左右,就表示interviewer對你有相當興趣。不過如果你直接問佢請唔請,其實冇意思的,有時仲會令人覺得你唔夠信心。


咁應該問乜嘢問題呢?

1. 請問呢個崗位係喺團隊中邊一個位置?整個團隊架構係點?

IT同任何部門一樣,都需要團隊合作,同埋同其他部門溝通。問一啲同崗位相關嘅問題,可以令人覺得你已經有心理準備去迎接新工作,如果interviewer肯詳細答你,你可以再追問日常工作流程等。


2. 請問我返呢份工之前,仲有乜嘢要準備/學習?

IT工作其實比其他工作特別,因為IT變化得太快,job ad要求你識嘅嘢,你總有啲係唔識或者唔熟。呢個時候,你可以要求interviewer話你知你有咩不足之處,如果真係要做呢份工,你仲差咗啲乜。從佢嘅答案中,你會知道自己同份工嘅要求差距有幾大,從而估計佢請你嘅機會大唔大。

另外,你問呢個問題,亦都表現到你知道自己嘅不足,但同時亦好主動去令自己進步,好多interviewer都會因為咁而加你分。


3. 請問我會有幾多日AL?保險包唔包屋企人?Probation period係咪3個月?

呢類問題只限問HR,如果唔係HR,個interviewer都只會叫你問返HR。有時當你手上有唔只一個offer的話,工作內容同呢的benefits就係好重要嘅比較條件,所以有機會就要問清楚,HR係有責任同你講清楚嘅。

有啲人會同你講「未confirm offer唔好問benefits住」,咁就要睇係你強勢啲定對方強勢啲。例如你係一個A.I.專家,你都好肯定而家好難請到人,而你手上唔止一間公司interview緊,而亦好有信心你會得到超過一個offer,換句話說,你係非常強勢,基本上係你揀工多過工揀你,咁你一定要問benefits。相反,如果你只係一個啱啱讀完大學嘅會計仔,冇經驗,冇專長,咁就當然係人哋畀咩你都要接受,呢種情況咁早問benefits就冇乜意思。

簡單嚟講,benefits嘅資料係用嚟比較不同offer,但如果你連一個offer都好難得到,就冇乜需要比較囉。


最緊要表現出你好想要份工

其實將心比心,如果你作為一個老細,想出錢請個人返嚟幫手,你都想佢有齊晒你要嘅條件。但好多時都係事與願違,嚟見親嘅candidate一係就識嘅嘢唔齊全,一係就叫價太貴或者嫌年假少,一係就一睇就知唔想做呢份工,甚至根本唔係想打工。

所以如果你去見工,就要表現到好想做呢份工,人工同年假都唔同佢計較,好想即刻返呢份工。如果你可以喺Q&A環節都以此為目標,咁就算你能力上差少少,都會表現得比其他candidate好,咁就有機會攞到個offer。

 

Sam Yung

 

在香港IT界打滾多年,從一個小小的Programmer開始奮鬥,到成為某大公司的IT管理人員,親歷科網泡沫爆破後,香港IT界慘不忍睹的境況。網誌:香港IT人

 

檢視此作者的所有文章

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

延讀閱讀:

今日係我嘅last day(1):新仔programmer篇

香港IT人:下一份IT工是天堂,還是地獄?

IT人搵工攻略(3):外行人能否入行?

 

想尋找你下一個機遇? 立即瀏覽jobsDB最新Information Technology (IT)職位