IT狗、文妓、地盤佬……這8種職業為何飽受歧視與攻擊?

IT狗、文妓、地盤佬……這8種職業為何被嘲被歧視?

好地地打份工,用腦力勞力賺取薪金,卻被冠以XX佬、XX狗、阿四,甚至X屎……花名背後隱含職業歧視,豈有此理!查實一些容易讓人標籤為厭惡性的行頭,屬人棄我取的另類筍工,或者是業界懷抱着「我不入地獄,誰入地獄」的神聖服務使命,respect。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析

 

[第一類型職業歧視]

香港地,遭受歧視的工種,其一是常人以為入職要求不高,工作環境差,不是沙塵滾滾,就是陰深恐怖……從業員往往有個「佬」字跟尾,形象毫不討好。殊不知不同行頭的「佬」們、「姐」們,無視歧視,點會咁易俾你估到!

逆轉形象,掃走定型

1.地盤佬,賺得到,潮得起

在地盤打工,日曬雨淋,說話粗豪,卸下布滿泥跡漆油的工裝時,依然不修邊幅?某高級古着店老闆爆料,入手貴價貨的,並非時尚達人,多的是年輕地盤佬。皆因他們縱有學歷,寧棄好睇唔好食的寫字樓工,投身入息普遍不俗的建造界,搵得嚟,當然使得去。

2.咕喱,愛自由,做物流

「細時唔讀書,大時做運輸」這句話,歧視味濃得化不開。做運輸,以前叫做咕喱,依家興叫物流,大學有得讀,順豐都係靠佢起家,「錢」途如何,毋須多講。諗起咕喱,即刻湧現周身臭汗的大隻佬印象?「港版羅拉」朱芊佩就打破大眾成見。樣貌娟好的伊人上內地真人騷雖被「封盤」,卻表示照做搬運工,愛自由嘛。

3.通渠佬,通「塞」物,師傅級﹗

通渠佬幾乎係家傳戶曉人物,可能同港人重視廁所暢通度有關,雖然其他相類似行業如「開鎖佬」亦被佬化,但每當人們提到通渠時總覺得與排洩管道有關,厭惡性指數爆燈。其實通渠不一定只通馬桶,家中水管有「塞」物都靠他們,所以「通渠」功架有其技術含量,請稱他們為通渠師傅吧﹗

4.仵作佬,膽大心細,薪優糧準

和屍體打交道的殮房服務員,厭惡指數甚高,總被一般人「另眼相看」,甚至忌諱。不過駐守醫院的殮房人員,還要協助法醫解剖,比「仵作佬」工作範圍更廣。而且每次有空缺,總是惹來城中熱話,兼多人申請。無他,此職位毋須專業技能,但起薪點近兩萬,鐡飯碗一隻;有些新式停屍間,都幾窗明几淨。擔得抬得的大膽樂天派,敬請留意招聘廣告。

▪地盤佬日誌:地盤限定,你問我答——地盤佬搵幾銀?

▪打工求Title:Happiness Engineer、Chief Funster、G.O.是甚麼?有趣職銜的吸引力法則

[第二類型職業歧視]

近年有些斯文工種,本身雖無過犯,卻被一些鍵盤戰士針對其工作性質,配上刻薄花名,盡情恥笑。從業員無端中箭,簡直無語問蒼天。

逆轉心態,你有你唱衰,我有我使命

5.空中阿四既自嘲亦自重

首當其衝的,是曾經萬人迷的空姐/空少。隨着搭飛機不再罕有,空姐的高貴面紗亦被撕破,原來其工作性質與侍應無異。最近一宗個案更要為肥胖乘客清理「後庭」,慘。空姐在機艙確係做到無停手,卻有休假多,環球見識多的優點,仍具吸引力。再睇啲空姐內幕書,佢哋雖自稱阿四,但能為全人類服務,就算是阿四,都是「無國界阿四」,幾有使命感㗎。

▪為Upgrade可以去到幾盡?空姐:「有客話剛割包皮、有客要求吸多啲氧氣。」

6.有一種萬能key叫IT狗

從天堂下凡的,還有IT界。從型到爆裂的高科技精英,「淪落」為IT狗。伏在地上整理亂糟糟的插頭,幾似狗仔。由hang機print嘢到打IDD都關佢事,做到隻狗。然而,阿Q啲諗,個個員工都需要「搵IT部」,即係大有存在價值,呢頭俾人cut,嗰頭已返新工。衰極都有大台熱播處境劇幫大家伸冤:「我哋係IT人,唔係IT狗!」

7.文妓?係一種認證﹗

寫字行業,近年如KOL、媒體小編興起,寫文可以呃like,量化成績,但都會俾刻薄網民鬧爆:「你哋班文妓又亂寫﹗」要知自古文人多自傲,無端端被淪落「風塵」都幾陰公,不過既是文字遊戲,網民不會嬴得過一班文字師,神覆:「多謝賜閱,文技認證﹗」。

8.人人都係sale屎

營業員推銷員經紀,通稱sales,諧音sale屎,是種市場需求大,客戶好感度時高時低的行頭。幫你買樓賣樓租屋買保險。服務好貨色佳時,愛之﹔落嘴頭令人落疊而貨不對辦時,恨之。其實,就算做緊不同職業,終極都係做sale屎,推廣「我」呢件產品。由幼稚園開始,就要向校長sell自己,先至有書讀。而營銷過自己,就知要做個一流sale屎,係幾咁超高難度。

▪Son姐教路:做了IT十年,轉工不轉工?

▪學好英文要靠NET?香港的英語老師不只聘請外國人,雙語人材更有優勢

職業歧視無日無之,由「好仔唔當差」變「新紥師兄」;廚房佬升呢廚神……要抺去歧視眼神,有靠局中人嘅血汗努力嘞。

延讀閱讀:

置地記者:「一味擴音的喇叭,累人累己知道嗎?」

置地記者:唔辛苦邊得世間財

辦公室小薯:好人有分真與假,真好人犯蠢也可怕

Increase your chances of getting hired. Create a jobsDB profile

Increase your chances of getting hired. Update your jobsDB profile