Lunch「被孤立」?笑面迎戰殘酷遊戲!

孤立

有唔少人努力搏殺,為口奔馳,一到食晏時間總想食餐好,兼利用一個鐘充電養神。可是打工仔對於午飯呢個慨念總係好玄妙,三五成群物以類聚講是講非已是必然,非我族類者定必被拒諸門外。以下係兩個真實個案,你會唔會感同身受呢?

個案一:排斥異己,鞏固勢力

A經理同B經理隸屬同一個部門,有一群共用下屬,B比A後期加入,卻深得老闆歡心,A對B一直好妒忌。為免失勢,A每周有幾日約埋所有部門下屬外出食lunch,唯獨唔約B,A的目的顯而易見,存心搞小動作同下屬拉關係,亦有心令B難堪。如果你係B,你會點做呢?

其實B一早看穿了A的動機,每周間中一日,趁A與同事外出食lunch,B主動表示想加入其中,A當然無法拒絕間中一日的要求,唯有扮大方表示歡迎,B會主動發掘多些共同話題,有時唔介意早點「攞位」、諗多幾個食lunch好地方,令A氣在心頭。B之所以咁做唔係存心同A鬥,而係唔想落入佢嘅離間計。A眼見B表現大方得體,自己嘅「苦心」無法如願,加上老闆繼續對B寵愛有加,最終感到冇癮要大方接納B。

個案二:孤立新人

呢個係經常發生嘅實例。C小姐加入一家小型廣告公司做AE,全公司都是清一色女同事,晚晚開OT開通宵,長期怨氣沖天,老闆又惡頂,大家務求少做少錯,你死你事。C返新工的第一天,除咗老闆秘書外,一個同事都冇主動同佢打招呼,氣氛崩緊。C於是主動邀約她們食lunch,班女同事面露不悅之情勉強應承,可是到飯局之後,C於茶水間聽見班女同事以不客氣的口吻說:「C想扮friend扮好人?搏咩呀?一睇就知佢得呢兩下板斧唔會掂啦!」 C笑面迎戰,女同事更賣力孤立唔理C。徬徨無助的新人C,究竟會點做呢?

新人同舊人跟上司和下屬一樣,需要有一段磨合期,在上述個案,C一直對住班女同事展現友善態度,就算內心如何委屈,都不忘保持謙虛有禮,並主動向同事伸出援手。忍辱負重三個月後,舊人開始對C逐漸改觀,合作過程開始變得融洽順暢。

以上個案只是冰山一角,無論你遇著什麼難堪的「被孤立」情況,都要表現得大方得體。只要待人接物誠懇兼有量度,對人對事問心無愧,便不必在意這些無聊的低裝遊戲,更不必因此而貶低自己,正所謂「道不同不相為謀」,其實有時自己食飯仲自在啦!