【Marketing同學仔要知】Fresh Grad寫CV五個通病 + 執靚大法

【Marketing同學仔要知】Fresh Grad寫CV五個通病 + 執靚大法

唔少Fresh Grad喺寫CV嘅時候都會覺得好頭痛,點樣用CV成功令未來老闆留下好印象呢?撓爆頭都唔知點寫好?唔使愁,呢篇文章會整理5個Marketing Fresh Grad嘅通病,同埋教大家點樣執靚張CV!


1.忘記CV是推銷自己的宣傳品

要記得CV就係推銷自己嘅工具,要將自己當成一件最好嘅商品,並且落力去Sell!聽落好似有點難度,因為同學仔始終係人,唔係產品,但其實可以套用行銷策略,寫一份百發百中嘅完美CV。

尤其係Marketing朋友仔,CV可以話係代表你嘅宣傳品。不妨套用學過嘅行銷專案法則,令自己份CV喺眾多求職者之中脫穎而出。


2.沒有去了解求職公司

求職如戰場,盲舂舂上陣好容易被秒殺。如果你唔了解間公司嘅背景,唔知道佢哋需要招聘咩能力嘅人才,每封求職信都只係求求其其,複製貼上嘅話,分分鐘寄過百封CV都冇回音。大包圍申請好正常,但千祈唔好一份CV走天涯!

寄出CV之前,要先做好功課,了解求職公司嘅規模、業務內容、人才需求等等方面,思考佢哋需要乜野,然後針對性地執靚CV。公司越心儀,CV就越要畀時間度身訂造,唔懶得。關鍵字眼上,突出同強調自己有相關能力,係佢哋需要嘅新血。


3. 不知道自己的價值定位

每個人都有自己擅長嘅技能、個性同經驗,所以要搵出並放大自己嘅長處。可能你文字功力好了得,一個標題已經吸到高瀏覽量;或者你剪片一流,係一名呃like高手,喺社交媒體平台勁多人追蹤。

CV入面除咗要簡單而有力咁講出自己嘅專長,仲要將專長連結到要應徵嘅職位,務求令求職公司知道,喺工作上面,你可以提供到乜嘢價值同效益。而唔相關嘅專長就可以省略不提。


4.沒有好的表達策略

你有才華之餘,更要識得同人講你有才華。好嘅表達策略,會加強推銷自己嘅效果。

審視多次自己份CV,結構上有冇得再優化呢?你想突出邊啲關鍵字?CV嘅格式同設計有冇增加你嘅競爭優勢?例如,你希望CV格式呈現嘅感覺係有創意得來,又清晰、條理。咁你會用咩方法去達到想要嘅效果呢?

提醒同學仔多次,記得要根據求職公司嘅需求,而決定表達策略。唔好只係用自己角度,要換位思考,過到未來老闆嗰關先至最重要。


5.只著重自我介紹,沒有提及效益

一間公司決定請唔請你,會好現實咁衡量你之後幫唔幫到公司賺到錢或者發展。所以除咗喺CV花篇幅寫自己性格、專長、經驗、成就之外,仲要講得深入少少,概括用咩方法成功做到。

Fresh Grads工作經驗唔多,但相關實習經驗或學會活動經驗等等,都可以成為加分位。應該善用自己過往嘅經驗同成就,用數據或理據,證明自己有能力為公司帶嚟新價值。


講咗咁多,大家知道點樣寫份CV未?從事管理層嘅Thomas,就分享咗佢心目中一份靚CV應該有嘅客觀要素。

經理Thomas:「關於CV格式,1-2 頁就夠,最好用point form,因為HR一次要睇太多份CV,太長氣、太多其實畀人感覺唔好,會直接skip唔睇!試過有Fresh Grads由小學參加過嘅課外活動,到大學上莊果啲全部寫晒,成疊紙,真心得啖笑⋯⋯」

所以話,廢話太多,反而累事,要講重點!

例1) 假如你想做公關公司,讀U果陣搞過好多次展覽活動,每次都成功吸引到預期參加人數嘅2倍或以上,突出自己擁有出色嘅策劃同埋執行能力,加分!

例2) 假如你想投身Digital Marketing,本身又有寫開blog,玩FB、IG或YouTube之類,CV入面可以強調自己熟悉操作各大社交平台玩法;若果擁有穩定瀏覽量或者有唔少粉絲,更加係亮點。呢種具備自我行銷(self-marketing)嘅意識同能力,加分!

例3) 假如你想做Consultancy,擁有喺品牌公司實習嘅相關經驗,負責做市場調查、消費者偏好等工作,咁就係相當有幫助嘅經驗,可以講多啲跟住專業團隊做嘢有咩得著。

例4) 假如你想做in house行銷人,不過又冇咩經驗,咁喺自身個性同技能方面就要延伸講多啲,最好用事件說明,例如:「溝通能力出色,在大型聯校活動中擔任主要聯絡人的角色,對處理客戶關係有信心。」唔好一句行貨「有良好溝通能力」就算數,要盡量展現自己有誠意嘅一面。要知道其實HR都預左Fresh Grad經驗唔多,但個個老闆都鐘意正面又有熱誠嘅求職者。


寫CV其實冇想像中咁難,只係需要花啲時間同心機。Fresh grad朋友仔全部都係潛力股,希望大家都一擊即中搵到心水工作!


延伸閱讀:

調查:僱主收到畢業生CV會睇啲乜?

市場學角度拆解錯誤履歷表範例


此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案